Kuri uyu wa 29/03/2022 ikiganiro ku ireme ry'uburezi cyibanzweho mu nama yahuje umuyobozi mukuru w'Ikigo cy'Igihugu gishinzwe ibizamini n'Ubugenzuzi bw'Amashuli (National Examinations and School Inspections Autority/ NESA) Dr Bahati Bernard, umuyobozi w'Akarere ka Ngororero, inzego z'umutekano, abashinzwe uburezi ku Karere no mu mirenge, ba nyir'ibigo by'amashuli n'abayobozi b'ibigo by'amashuli.
Habayeho kwisuzuma harebwa uburyo ireme ry'uburezi ryatera imbere bityo mu gihe kiri imbere Akarere ka Ngororero kakazagira umusaruro mwiza.
Abarezi bagaragaje ibibazo bituma batagera ku musaruro mwiza birimo gusiba ishuri kw'abana, imiyibororere y'amashuli idahwitse ku mashuli amwe namwe, abalimu badahagije cyangwa badafite ubumenyi busabwa, imikorere idahwitse y'ubugenzuzi mu mashuli, gukorera ku jisho kwa bamwe mu balimu, imihigo idashyirwa mu bikorwa, gutanga raporo zitari zo ku myigire y'abanyeshuli n'ibindi.
Mu gufata ingamba umuyobozi w'Akarere yavuze ko buri wese agomba kubazwa ibyo akora yaba umwalimu, yaba umuyobozi w'ishuli, yaba umugenzuzi w'uburezi mu murenge, yaba abashinzwe uburezi ku Karere.
Nanone mu gushyigikira ireme ry'uburezi umuyobozi w'umwalimu Sacco  yavuze ko hagiye gukoreshwa ikoranabuhanga kuburyo umwalimu azajya yaka inguzanyo y'ingoboka atagombye guta akazi. Mbere y'uko umwaka urangira hazatangira internet banking mu Umwalimu Sacco. Ibi bikazatuma abalimu batazongera guta igihe baza ku kicaro cyayo.
Umuyobozi w'Akarere yashimangiye ko iterambere ry'Akarere n'iry'Igihugu muri rusange biri mu maboko y'abalimu. Ati niyo mpamvu bagomba guhora bitwararika ireme ry'uburezi rikagerwaho.  
Umuyobozi mukuru wa NESA yavuze ku myigire n'imyigishirize yemera ko bibazo byagaragajwe bizagenda bibonerwa ibisubizo uko ubushobozi buzagenda buboneka.
Yongeyeho ko umuyobozi w'ishuli mwiza ari udakangwa n'ibibazo ahubwo agaharanira kugera ku ntego zifatika ashakira ibisubizo ibibazo byagaragaye.

Muri iyi inama hanavuzwe ku ifunguro rya saa sita rifatirwa kw'ishuli. Hafashwe ingamba ko ababyeyi bagomba gukomeza gukangurirwa kugira uruhare rukomeye mw'igaburo ry'abana babo. Mu Karere ka Ngororero abana 67% nibo bashobora gufatira ifunguro kw'ishuli.
Avuga ku kuva mw'ishuli kw'abana DG wa NESA yagaragaje ko umwana utiga aba ari umutwaro uremereye ku gihugu. Hanzuwe ko inzego zose zikwiye gutahiriza umugozi umwe ikibazo cya drop out kikabonerwa umuti urambye.
Avuga ku ikoranabuhanga yasabye abayobozi b'ibigo by'amashuli gukoresha mudasobwa bahawe aho kuzifungirana mu tubati. Yanibukije ko bagomba kugira uruhare mu gushishikariza abana guhitamo amashuli  y'imyuga n'ubumenyingiro.
Asoza inama umuyobozi w'Akarere yasabye imparirwakurusha z'abalimu kurushaho gukundisha abana ishuli, gutsinda no guhora bazirikana kuzamura ireme ry'uburezi.