Kuri uyu wa 13/04/2022 igikorwa cyo kwibuka ku nshuro ya 28 Jenoside yakorewe Abatutsi cyakomereje ku rwibutso rwa Cyome, mu bitaro bya Muhororo no ku rwibutso rwa Jenoside yakorewe Abatutsi rwa Kibirira.

Ku Cyome hunamiwe inzirakarengane zajugunywe mu mugezi wa Nyabarongo.
Mu bitaro bya Muhororo hunamiwe abarwayi, abarwaza n'abakozi biciwe muri ibi bitaro naho ku rwibutso rwa Kibirira hunamiwe inzirakarengane 24,728 ziharuhukiye.
Iki gikorwa cyitabiriwe na Komite Nyobozi y'Akarere, abagize inama Njyanama y'Akarere, abadepite, abihaye Imana, imiryango ifite ababo bajugunywe mu mugezi wa Nyabarongo, biciwe mu bitaro bya Muhororo n'abaruhukiye  ku rwibutso rwa Kibirira.

Abitabiriye kwibuka ku nshuro ya 28 Jenoside yakorewe Abatutsi ku rwibutso rwa Kibirira bahawe ikaze n'umuyobozi w'Akarere  Bwana Nkusi Christophe wihanganishije abarokotse Jenoside abasaba gukomeza gutwaza kuko ubuyobozi bwiza bw'Igihugu cyacu bubari hafi.

Yavuze ko ubumwe n'ubwiyunge bukibangamiwe n'abagifite ingengabitekerzo ya jenoside bakibiba amacakubiri bifashishije imbuga nkoranyambaga. Yasabye buri wese kubamaganira kure kandi hakirindwa ibikorwa n'amagambo byatoneka inkovu z'abarokotse.

Nyuma yo gushyira indabyo ku rwibutso rwa Kibirira abitabiriye kwibuka bakurikiye ikiganiro gifite insanganyamatsiko "Twahisemo kuba umwe".Ikiganiro cyatanzwe n'umujyanama wa Komite Nyobozi Bwana Mutwarangabo Innocent.

Yavuze ku mateka y'u Rwanda mu gihe cy'ubwami, ubukoloni na Repubulika.
Yagaragaje uburyo igihe cy'ubwami abanyarwanda bari bene mugabo umwe, bunze ubumwe, baharanira iterambere n'ubusugire bw'Igihugu; abakoloni bakaza kubabibamo amacakuburi yaje gushyigikirwa n'ubuyobozi bubi bikagera kuri Jenoside yakorewe Abatutsi.
Yavuze uburyo ubuyobozi bwiza bw'Igihugu cyacu bwakoze ibishoboka byose bakagarura ubumwe mu banyarwanda ubu bakaba bateye imbere ku buryo byabereye amahanga urujijo.

Umwe mu barakotse Jenoside yakorewe Abatutsi mu murenge wa Gatumba Gahongayire Marie Louise yavuze ku nzira y'umusaraba Abatutsi bo muri uyu murenge banyuze ubwo abicanyi  batwikaga amazu barimo ubuyobozi burebera. Yanavuze uburyo babohaga Abatutsi bakabajugunya mu mugezi wa Nyabarongo.

Perezida wa Ibuka mu karere ka Ngororero yagarutse ku bibazo abarokotse bagihura nabyo nko kuba imanza za gacaca zitarangizwa ngo bishyurwe ibyabo byononywe n'abishe ababo, kuba hakiri bafite amazu adatunganye, kuba hakiri imibiri itaraboneka ngo ishyingurwe mu cyubahiro kand hari abazi aho iherereye bacecetse.

Umushyitsi mukuru muri iki gikorwa yari Hon. Madina Ndangiza. Yihanganishije abarokotse Jenoside anashima uburyo bataheranywe n'agahinda bakaba bageze kure biyubaka. Nawe yamaganiye kure abakibangamiye ubumwe n'ubwiyunge babiba amacakubiri mu banyarwanda,

Yavuze ko batazahwema gukora ubuvugizi kugirango ibibazo abarokotse jenoside bagihura nabyo bibonerwe ibisubizo.