Mu gusoza ibikorwa  by'inzego z'umutekano z'u Rwanda n'iza EAC bimaze amezi 3 bizihuza n'abaturage; Minisitiri w'Umutekano akaba n'Imboni y'Akarere muri Guverinoma Hon.  Biruta Visenti yayoboye igikorwa cyo gutaha amazu 10 yubatswe ku bufatanye bw'Akarere n'inzego z'umutekano (Ingabo na Police) z'u Rwanda n'iza EAC mu murenge wa Gatumba kuri site ya Karambo.

Aha ikaze abashyitsi Umuyobozi w'Akarere Bwana NKUSI Christophe  yaboneyeho gushimira ubuyobozi bwiza bw'Igihugu cyacu burangajwe imbere na Nyakubahwa Perezida wa Repubulika Paul Kagame buhora buzirikana iterambere ry'imibereho myiza y'abaturage.
Yasabye abahawe amazu kuyafata neza agira ati: "umwana uzi ubwenge bamusiga yinogereza".
Nyirabeza Vestine ni umwe mu bahawe inzu. Nawe yashimiye ubuyobozi bwiza bw'Igihugu cyacu buhora buzirikana iterambere ry'imibereho myiza y'abaturage bityo umuturage agahora ku isonga.
Ati ntitucyitwa abatishoboye kuko twashobojwe n'ubuyobozi bwiza buhora butuzirukana.
Hon. Minister Biruta wari umushyitsi mukuru yasabye bene amazu kuyafara neza kimwe n'ibikoresho birimo. Yabasabye gukora cyane bagatera imbere kurushaho.
Yashimangiye ko inzego z'umutekano  ari abafatanyabikorwa mw'iterambere rirambye asaba abaturage kuzishyigikira birinda icyahungabanya umutekano aho cyava hose.
Yashoje yifuriza abaturage umunsi mwiza wo Kwibohora ku nshuro ya 31.
Iki gikorwa cyitabiriwe kandi na Guverineri w'Intara y'Iburengerazuba Bwana Ntibitura Jean Bosco, abayobozi b'Inzego z'Umutekano ku rwego rw'Intara n'Akarere, Komite Nyobozi y'Akarere abayobozi n'abaturage b'umurenge wa Gatumba n'iyo bihana imbibi.