Kwizihiza umunsi mukuru w'Intwari z'Igihugu ku rwego rw'Akarere ka Ngororero byabanjirijwe no gutaha umuyoboro w'amazi wa Gaseke mu murenge wa Nyange wubatswe ku nkunga ya World Vision. Ufite uburebure bwa km 30, amavomo 28,  uzaha amazi meza abaturage 8.900.
Umuyoboro watashywe n'Umunyamabanga nshingwabikorwa w'Intara y'Iburengerazuba Madame Uwambajemariya Florence ari kumwe n'umuyobozi w'Inama Njyanama y'Akarere Madame Nyiramasengesho Jeannette, umuyobozi w'Akarere Bwana Nkusi Christophe, intumwa za World Vision, abayobozi b'inzego z'umutekano n'abagenerwabikorwa babonye amazi meza.

PES Uwambajemariya yasabye ababonye amazi meza guca ukubiri n'isuku nkeya barwanya indwara ziterwa n'umwanda. Abaturage baboneyeho gushimira Nyakubahwa Perezida wa Repubulika uhora azirikana iterambere ryabo.
Hanasuwe umuhinzi wa kijyambere wateye imbere abikesha ubuhinzi bw'urutoki. Abahana imbibi nawe basabwe kumwigiraho.
Ibirori nyirizina byabanjirijwe n'urugendo rwo gusingiza Intwari z'Igihugu no gusura inzu y'amateka y'ubutwari bw'abanyeshuli b'i Nyange; abaje kwizihiza uyu munsi biganjemo urubyiruko basobanuriwe ubutwari bwaranze aba banyeshuli; bamwe muri bo bahisemo guhara ubuzima bwabo aho kwitandukanya bakurikije amoko y'icyo gihe nk'uko babisabwaga n'abicanyi.
 Bityo baba babibye Imbuto ya Ndumunyarwanda. Abashyitsi bunamiye Intwari z'Imena bashyira indabyo aho ziruhukiye.

Umuyobozi w'Akarere Bawana Nkusi Christophe yasabye abitabiriye ibirori gufata urugero rwiza rw'aba bana avuga ko kuba intwari bidasaba imyaka cyangwa igihagararo ahubwo ko bisaba umutimanama ukunda icyiza kandi ukagiharanira.
Muri ibi birori urubyiruko rw'abakorerabushake rw'Akarere rwa Ngororero rwagabiye  umuturage Muhamyangabo Aloys warokoye abantu 2 bari mu kaga mu gihe cya Jenoside yakorerwaga Abatutsi ubu akaba ari umurinzi w'igihango.

Umunyamabanga nshingwabikorwa w'Intara y'Iburengerazuba wari umushyitsi mukuru yashimye uburyo urubyiruko rwitabiriye ibirori byo kurata ubutwari bw'Intwari z'Igihugu abasaba kugera ikirenge mu cya bakuru babo b'i Nyange. Yasabye abakuru bari mu birori gufata urugero rwiza ku banyeshuli b'i Nyange banze kwitandukanya bakurikije icyitwaga amoko icyo gihe nk'uko babisabwaga n'abicanyi ahubwo bagakomera ku bunyarwanda bubahuza.

Yagarutse ku butwari bwaranze ingabo zabohoye u Rwanda avuga ko kuba u Rwanda rwuje umudendezo n'iterambere bituruka kubarwitangiye bakemera guhara ubuzima bwabo bagambiriye ejo heza h'Urwababyaye.

Yasabye buri wese kwirinda gutatira igihango "dufitanye n'Intwari z'Igihugu, tukagera ikirenge mu cyazo turangwa n'indangagaciro nyarwanda."

Umunsi mukuru waranzwe n'ibirori birimo imbyino, indi\rimbo n'imivugo byose byagarukaga ku bigwi by'Intwari z'Igihugu.