Kwizihiza ku nshuro ya 31 umunsi w'Intwari z'Igihugu byabereye mu mirenge yose ku nsanganyamatsiko igira iti "Ubutwari n'Ubumwe bw'Abanyarwanda,  inkingi z'iterambere. " Ku rwego rw'Akarere wizihirijwe  ku gicumbi cy'Intwari z'Imema z'abanyeshuli b'i Nyange mu murenge wa Nyange 
Ibirori byabanjirijwe no gusura  inzu ibumbatiye amateka y'Intwari z'Imema z'abanyeshuli b'i Nyange aho abaje kwizihiza uyu munsi basobanuriwe aya mateka mu ipfundo ryayo ari ryo joro ryo kwa 18 rishyira uwa 19/03/1997. 
Muri iri joro nibwo izi Ntwari zagaragaye igihe banze kwitandukanya  bakurikije amoko y'icyo gihe babisabwe n'abicanyi bari bateye iryo shuli. 

Bavugiye icyarimwe bati "Twese turi abanyarwanda", bityo baba babibye imbuto ya "Ndi Umunyarwanda" ubu yinjiye mu mateka y'u Rwanda by'umwihariko n'isi yose muri rusange". Igikorwa cyakomereje ku gicumbi cy'izi Ntwari. Abitabiriye bazunamiye bashyira indabo ku mva.
Ibirori byitabiriwe n'itsinda ry'abadepite mu Nteko Ishinga Amategeko, Umunyamabanga Nshingwabikorwa w'Intaray'Iburengerazuba Madame Uwambajemariya Florence, abagize Komite Nyobozi y'Akarere, abayobozi b'Inzego z'Umutekano zikorera mu Karere, bamwe mu bajyanama mu Nama Njyanama y'Akarere, abayobozi b'amadini n'amatorero, ab'amashuli abanza n'ayisumbuye,  abanyeshuli n'abaturage b'Umurenge wa Nyange.

Ibirori byaranzwe n'impanuro z'abayobozi zarataga ibigwi by'Intwari bagira bati “Kuba intwari ntibisaba imyaka, igihagararo, ubutunzi, ububasha,…. bisaba kugira umutima wa kimuntu wuje indangagaciro zirimo iyo gukunda igihugu n'abagituye…”