Ku rwego rw'Igihugu umunsi mpuzamahanga w'umugore wizihirijwe mu Karere ka Ngororero mu murenge wa Hindiro ku nsanganyamatsiko igira iti: "Umugore ni uw'agaciro" (Empowered Women, Stronger Nation)
Umunsi waranzwe b'ibirori by'akataraboneka n'impanuro z'abayobozi byose byerekezaga ku gaciro k'umugore mu muryango nyarwanda.

Perezida w'Inama  y'Igihugu y'Abagore Madame Nyiramajyambere Berancille yashimiye ubuyobozi bwiza bw'Igihugu cyacu bwashubije agaciro abagore bakaba bisanga mu bice byose by'amajyambere.
Yagize ati: "natwe abagore dufite ingamba mu kwihutisha NCT 2  dukora cyane, twihuta kurushaho mu iterambere. 
Duhoze umutima ku  muryango ushoboye kandi utekanye uzira amacakubiri n'amakimbirane."

Imbaga y'abitabiriye ibirori bumvise ubuhamya bw' umuryango wabagaho mu makimbirane ubu ukaba utekanye, ugeze kure mu iterambere kuko wabyaje amahirwe aho batuye:
Bayobotse amatsinda yo kubitsa no kugurizanya, bakora imishinga ubu baratunze baratunganiwe buri mwaka bagura inka. 

Intumwa ya UN WOMEN yibukije abagore ko bari mu  mbaraga zubaka igihugu  asaba iinzego zose gukomeza gushyigikira imugore.
Umunsi waranzwe kandi no kuremera imiryango itandukanye yahawe inka, ibigega bifata amazi n'amashyiga ya kijyambere. Abagore bamuritse ibikorwa bibateza imbere haba mu buhinzi, ubworozi , ubukorikori, ububoshyi, imyuga n'ibindi.
Guverineri w'Intara y'Iburengerazuba Bwana Ntibitura Jean Bosco yagarutse ku mateka yadindije umugore, ashimira ubuyobozi bwiza bw'Igihugu cyacu budahwema kwimakaza uburenganzira bw'umugore  mu nzego zose ntaho bahejwe.

Ubu bafite uruhare mu buzima bwose bw'Igihugu haba mu mutekano, ubukungu na politki.
Yasabye ko ibikibangamira uburenganzira busesuye bw'umugore (ihohoterwa rishingiye ku gitsina no ku mutungo, abangavu batwita inda zitateganijwe, kuba hakiboneka abagore batari bitunyuka mu gukorana n'ibigo by'imali, abana bata ishuli,..) bigomba kuvaho burundu.

Presidente w'Inteko Ishinga Amategeko umutwe w'abadepite Hon. Kazarwa Gertrurde yashimiye abafatanyabikorwa bose batumye uyu munsi mpuzamahanga w'umugore ugenda neza, ashimira umuryango watanze ubuhamya asaba n'abandi babana mu amakimbirane kugera ikirenge mu cyabo.
Yagarutse ku nsanganyamatsiko y'uyu munsi yibanda ku ruhare  rw'umugore mu iterambere ry'u Rwanda. Yagarutse ku mbogamizi zikibangamira ihame ry'uburinganire asaba inzego zose gushyira hamwe izo mbogamizi zikavaho burundu.
Yavuze ko Inteko Ishinga Amategeko by'umwihariko Ihuriro ry'Abanyarwandakazi bo mu Nteko Ishinga Amategeko FFRP batazahwema guharanira ko agaciro k'umugore karushaho gushinga imizi muri sosiyete nyarwanda.

IBIRORI BY'UMUNSI MPUZAMAHANGA W'UMUGORE MU MAFOTO