Mu karere ka Ngororero kimwe no hirya no hino mu Gihugu hatangijwe ibikorwa by'urugerero rudaciye ingando rw'Inkomezabigwi icyiciro cya 10 ku nsanganyamatsiko igira iti: "Duhamye umuco w'ubutore twimakaza ubumwe n'ubudaheranwa". Ku rwego rw'Akarere igikorwa cyabereye mu murenge wa Nyange. Cyahuriranye n'igikorwa cyo gutangiza icyumweru cyahariwe ubuzima bw'umubyeyi n'umwana (14-18/11/2022) ku nsanganyamatsiko igira iti: Nta mubyeyi ukwiye gupfa ari kubyara".
Inkomezabigwi zagaragaje ibikorwa bagamije gukora birimo gufasha abatishiboye gutura heza, kurwanya imirire mibi, gutoza abakuze gukoresha ikoranabuhanga, kurwanya ingengabitekerezo ya Jenoside,....
Habayeho kandi guha abana ibinini by'inzoka, vitamine A, kubagaburira indyo yuzuye,no kubapima ibiro n'ibizigira.
Guverineri w'intara y'iburengerazuba Habitegeko François yifatanije n'abaturage b'umurenge wa Nyange muri ibi bikorwa byombi.

Yibukije abaturage by'umwihariko urubyiruko ijambo rya Nyakubahwa Perezida wa Repubulika Paul Kagame rigira riti: "urugerero ni ifumbire y'ubwenge". Yabasobanuriye insanganyamatsiko y'uru rugerero  maze
asaba ababyeyi gushyigikira urubyiruko rugiye ku rugerero kugirango ruzagere ku ntego y'ibyo rwiyemeje.

Yasabye kandi ubuyobozi gutegura ibikoresho nkenerwa ku rugerero, gutegura gahunda ziboneye z'ibikorwa  kugirango Inkomezabigwi zizagere ku musaruro wifuzwa.

Agaruka ku nsanganyamatsiko y'icyumweru cyahariwe ubuzima bw'umubyeyi n'umwana  yasabye urubyiruko kwigisha ababyeyi iyi nsanganyamatsiko ikaba impamo kandi igashyirwa mu bikorwa. Yasabye inzego z'ubuzima kuyigira iyazo baharanira ko nta mubyeyi wakabuze ubuzima arimo kubutanga. Iki gikorwa cyitabiriwe n'intumwa za RBC, umuyobozi w'Akarere ka Ngororero Bwana Nkusi Christophe, umwungirije ushinzwe imibereho myiza y'abaturage, abayobozi b'inzego z'umutekano n'ab'ibigo by'ubuzima bya zone ya Muhororo n'iya Kabaya. Ibikorwa byse byabanjirijwe n'umuganda wo kurwanya isuri.