Umuyobozi w'Akarere wungirije ushinzwe iterambere ry'imibereho myiza y'abaturage Madame MUKUNDUHIRWE Benjamine yakiriye itsinda ryaturutse mu nama y'Igihugu y'Abagore ku rwego rw'Intara y'Iburengerazuba riyobowe n'umuhuzabikorwa wayo Madamu Bagirinka Vestine. Baje gusuzuma aho imihigo ya Mutimawurugo igeze ishyirwa mu bikorwa.
Umuhuzabikorwa w'Inama y'Igihugu y'Abagore ku rwego rw’Akarere Madamu Mukeshimana Marie Claire yerekanye icyegeranyo cy'aho imihigo y'Ubukungu, imibereho myiza n'ubutabera igeze ishyirwa mu bikorwa.
We na bagenzi be bahagarariye CNF mu mirenge bashimiwe aho bageze besa imihigo, bagaragarizwa ahakwiriye gushyirwa imbaraga  kugirango bagere ku kigero gishimishije.
Hakurikiyeho gusuzuma  imihigo  mu nyandiko umurenge ku wundi nyuma bajya kureba uko imihigo ihagaze mu baturage nyirizina.

Muri icyo gihe umuyobozi w'Akarere Bwana NKUSI Christophe yakiriye umuyobozi wa Koperative Umwalimu Sacco ishami rya Ngororero.  Baganiriye ku mikorere n'imikoranire hagati y'inzego zombi. Branch manager w'Umwalimu Sacco mu Karere ka Ngororero yashimiye ubuyobozi bw'Akarere uburyo abanyamuryango b'iyi Koperative bagenda baba benshi kandi batera imbere; umuyobozi w'Akarere nawe ashimira ubuyobozi bw'iyi koperative iharanira kuzamura imibereho myiza ya Mwalimu, yizeza ubufatanye kugirango imibereho y'abalimu n'imiryango yabo irusheho kuba myiza.
Ibi biganiro bibaye nyuma y'uko Ubuyobozi bwa Koperative Umwalimu Sacco bugiranye inama n'abanyamuryango mu mirenge yose hasuzumwa uburyo serivisi z'iyi Koperative zarushaho kunogera abanyamuryango bayo.