Itsinda ryaturutse ku Ntara y'Iburengerazuba riyobowe na Guverineri w'Intara Bwana  Habitegeko François ririmo gusuzuma aho Imihigo y'Akarere ka Ngororero igeze ishyirwa mu bikorwa.
 Umuyobozi w'Akarere Nkusi Christophe yerekanye aho imihigo 98 igeze yeswa  umuhigo ku wundi. Nyuma itsinda ryaturutse ku Ntara bagiye inama zatuma imihigo irushaho kwihutishwa. Guverineri Habitegeko yibukije  ko imihigo myiza ari igaragaza impinduka nziza mu bagenerwabikorwa aribo baturage.
Hanasuzumwe aho ingengo y'imali igeze ikoreshwa kimwe n'itangwa ry'amasoko.
Iri tsinda rigizwe kandi n'umunyabanga nshingwabikorwa w'Intara Madame Uwambajemariya Florence, abayobozi b'inzego z'umutekano ku rwego rw'Intara n'abakozi ku rwego rw'Intara.
Ku rwego rw'Akarere bari kumwe na  Komite Nyobozi,Vice president w'Inama Njyanama y'Akarere, bamwe mu bajyanama n'abafatanyabikorwa, abanyamabanga nshingwabikorwa b'imirenge n'abakozi b'Akarere.

Ku munsi wa 2 w'isuzuma ry'imihigo y'Akarere ka Ngororero itsinda ryaturutse ku Ntara rifatanije n'abayobozi n'abatekinisiye b'Akarere ka Ngororero riri gukorera isuzuma mu bagenerwabikorwa nyirizina. Mu bikorwa byasuwe harimo amaterasi y'indinganire, ibikorwa byo kwihangira imirimo, kubakira abacitse kw'icumu rya Jenoside yakorewe abatutsi  mu murenge wa Kabaya; ishuli ry'imyuga TVET mu murenge wa Muhanda; gahunda ya girinka mu murenge wa Ngororero; koperative y'abafite ubumuga mu murenge wa Gatumba; guhuza ubutaka mu murenge wa Muhororo; amaterasi y'indinganire mu murenge wa Hindiro; amashanyarazi akomoka ku mirasire, imidugudu y'icyitegerezo mu murenge wa Nyange;  imihigo ya ba mutima w'urugo mu murenge wa Gatumba. Isuzuma ryaranzwe no kuganira n'abaturage harebwa impinduka nziza imihigo igira ku mibereho yabo. Hanabayeho kujya inama zitandukanye zituma imihigo irushaho kwihutishwa ikagera ku bipimo biteganijwe.