Inama y'Ihuriro ry'Ubumwe n'Ubudaheranwa ku rwego rw'Akarere ka Ngororero yateranye ku nsanganyamatsiko igira iti: "Twimakaze Ubumwe n'Ubudaheranwa."
Inama y'iri huriro yayobowe n'Umuyobozi w'Akarere Bwana Nkusi Christophe.
Umushyitsi Mukuru yari Guverineri w'Intara y'Iburengerazuba Hon. Ntibitura Jean Bosco wari kumwe n'Umuyobozi w'Inama Njyanama y'Akarere Madamu Nyiramasengesho Jeannette n'abayobozi b'inzego z'umutekano zikorera mu Karere. 
Mu guha ikaze abashyitsi Mayor  Nkusi yashimiye Nyakubahwa Perezida wa Repubulika Paul Kagame 
"wadutoje kuba umwe mu iterambere twifuza."
Yagaragaje uburyo Ubumwe n'Ubudaheranwa bwimakazwa mu Karere ka Ngororero binyuze mu:
- Biganiro bya Ndumunyarwanda; 
- Biganiro by'ihuriro ry'Ubumwe n'Ubudaheranwa mu nzego zitandukanye;
- Itorero mu mashuri no mu midugudu;
- Ibikorwa by'isanamitima
- Gushyigikira amatsinda 92 y'ubumwe n'ubudaheranwa;
- Clubs 119 mu mashuli;
- Gahunda ya TUMWUNGE TURWUBAKE iganiriza abakoze Jenoside barangije ibihano mu  rwego rwo kubafasha gusubira mu buzima busanzwe; ndetse ikanaganiriza abarokotse Jenoside yakorewe Abatutsi mu rwego rwo kubategura gukomeza kubana n'ababiciye….
Umuyobozi w'Akarere yanavuze ku mbogamizi zikigaragara:
- Ingengabitekerezo ya Jenoside ikigaragara kuri bamwe mu Karere; 
- Imibiri y'abazize Jenoside yakorewe Abatutsi mu 1994 itaraboneka ngo ishyingurwe mu cyubahiro;
- Abarokotse Jenoside yakorewe Abatutsi bagifite ibibazo by'ihungabana;
- Amazu 289 y'Abarokotse Jenoside yakorewe Abatutsi akenewe gusanwa,...
Ingamba:
- Kwirinda no kudahishira abagipfobya Jenoside yakorewe Abatutsi mu 1994;
- Gusana amazu y'Abarokotse Jenoside yakorewe Abatutsi batishoboye;
- Gukomeza kwita by'umwihariko ku barokotse Jenoside yakorewe Abatutsi bagifite ihungabana; 
-  Kurangiza burundu imanza z'inkiko gacaca;
- Gukomeza kwita kuri gahunda yo guhuza inzibutso;
- Gukomeza guhuza imbaraga mu gikorwa cyo kwerekana aho imibiri y'inzirakarengane iiherereye ngo ishyingurwe mu cyubahiro....
Meya Nkusi yashimiye abafatanyabikorwa,  inzego z'umutekano ubufatanye budahwema kugaragara mu rugendo rw'Ubumwe n'Ubudaheranwa mu Karere ka Ngororero. 
Ibindi byaranze iyi nama:
Kugaragaza imyanzuro y'inama y'Ihuriro ry'ubushize no kuyunguranaho ibitekerezo.
Ikibazo cy'abarokotse Jenoside yakorewe Abatutsi bagifite ihungabana, amacumbi y'Abarokotse Jenoside yakorewe Abatutsi agomba gusanwa, irangizwa ry'imanza za Gacaca, inzibutso ziruhukiyemo inzirakarengane bazize Jenoside yakorewe Abatutsi zitujuje ibisabwa, kuganiriza abakoze Jenoside barangije ibihano,... biri mu byatinzweho hasabwa ko byashakirwa ibisubizo bya burundu. 
Abari mu nama bakurikiranye ikiganiro "Gukumira no guhagarika ihererekanywa ry'Umurage mubi, kurinda no gusigasira indangagaciro z'Umuco Nyarwanda mu rubyiruko."
Umuyobozi w'Intara y'Iburengerazuba Hon Ntibitura Jean Bosco yagarutse ku Ingengabitekerezo ya Jenoside ikigaragara mu Karere avuga ko ifite imvano mu miryango ku ishyiga. Yasabye inzego zose guhuza imbaraga bagakora icyo yise "désintoxication" mu bakiri bato kuko bigaragara ko iyo ngengabitekerezo bayivoma mu miryango yabo.
Asoza imirimo y'iri huriro Guverineri Ntibitura yavuze ko “tugomba gukomeza guhuza imbaraga dusigasira ibyagezweho turwanya ingengabitekerezo ya Jenoside n'indi imyitwarire yadusubiza inyuma.”

Inama y'iri huriro yitabiriwe kandi na:

- abagize Komite Nyobozi y'Akarere;

- abajyanama mu Nama Njyanama y'Akarere;

- abanyamabanga nshingwabikorwa b'imirenge;

- abahoze mu buyobozi bw'amakomini, uturere n'Intara; (kuva 19/07/1994))

- abahozi ari abajyanama mu nama njyanama y'Akarere;

- urubyiruko bahagarariye abandi mu mirenge;

- abahoze ari abadepite mu Nteko Ishinga Amatetegeko;

-  abayobozi ba IBUKA ku rwego rw'Akarere

- umuyobozi w'Ihuriro ry'amadini n'amatorero

- ushinzw ubukangurambaga ku bumwe n'ubwiyunge ku rwego rw'Akarere