Mu Karere ka Ngororero Ibikorwa byo kwibuka ku nshuro ya 31 Jenoside yakorewe Abatutsi mu 1994 birakomeje.
Uyu munsi habaye igikorwa cyo kwibuka abari abakristo b'Itorero  ADEPR mu Karere ka Ngororero bazize Jenoside yakorewe Abatutsi mu 1994.
Igikorwa cyatangijwe n'urugendo rwo kwibuka rwatangiriye ku rusengero rwa ADEPR  Ngororero rwerekeza ku rwibutso rwa Jenoside yakorewe Abatutsi rwa Ngororero.  Aha abari mu rugendo bunamiye inzirakarengane ziruhukiye muri uru rwibutso bashyiraho indabo.
Igikorwa cyitabiriwe n'Umuyobozi w'Akarere Bwana Nkusi Christophe ari kumwe n'abayobozi b'inzego z'umutekano, abashumba, abakristo, abayobozi n'abaturage b'umurenge wa Ngororero.

Umuyobozi w'Akarere yihanganishije abarokotse Jenoside yakorewe Abatutsi agira ati "mukomere turi kumwe namwe, mukomeze mutwaze mw'iterambere. Jenoside ntizongera kubaho ukundi; dufite ubuyobozi bwiza bw'Igihugu cyacu bwimakaje ubumwe n'ubudaheranwa bw'Abanyarwanda. "
Yasabye buri wese kwamaganira kure abagifite ingengabitekerezo ya Jenoside bagishaka kubiba amacakubiri mu banyarwanda.
Mayor Nkusi: "duharanire kuba umwe nk'uko tubitozwa n'Intore izirusha intambwe Nyakubahwa Perezida wa Repubulika Paul Kagame "

Igikorwa cyaranzwe n'ibiganiro byaganishaga ku buryo Jenoside yateguwe ikanashyirwa mu bikorwa n'ubuyobozi bubi; ubutwari bw'ingabo zahagaritse Jenoside zikarokora abahigwaga.
Ubuhamya bw'uwarokotse Jenoside yakorewe Abatutsi mu 1994 bwashyize ahagaragara ubuzima bushaririye we na bagenzji be bahigwaga banyuzemo.
Yashimira ubuyobozi bwiza bw'Igihugu cyacu bwashubije agaciro abanyarwanda bose nta vangura.
Igikorwa cyashojwe no kuremera inka uwarokotse Jenoside yakorewe Abatutsi utishoboye.