Umuyobozi w'Akarere Bwana NKUSIChristophe ari kumwe n'Umuyobozi w'Akarere wungirije ushinzwe iterambere ry’ubukungu Bwana UWIHOREYE Patrick yakiriye Umuyobozi w'umushinga Food For Hungry (FFH) Rwanda, aherekejwe n’umuyobozi wa gahunda, ushinzwe abakozi n’ubuyobozi, hamwe n’umuyobozi wa gahunda ya FFH mu murenge wa Bwira.
Ibiganiro byibanze ku bikorwa bitandukanye byashyizwe mu bikorwa na FFH mu Karere cyane cyane mu murenge wa Bwira.
Ubuyobozi bw'akarere bwagaragaje ko bwishimiye  uruhare runini rwa Food For Hungry  mu iterambere ry’abaturage, cyane cyane mu kuzamura imibereho myiza yabo, kuzamura isuku n’isukura, no guteza imbere uburezi bufite ireme mu Murenge wa Bwira.
Impande zombi zashimangiye agaciro k’ubufatanye burambye, zigaragaza n' ubushake bwo gushimangira ubufatanye mu rwego rwo gushyigikira ibikorwa birambye by’iterambere ry’abaturage.

Incamake y'ibikorwa bya FFH mu murenge wa Bwira:

- Gutanga imbuto y’ibigori, ibirayi n’ishwagara

- Guhugura abagore n’urubyiruko mu myuga itandukanye

- Gutanga ibikoresho by’ibanze ku bize imyuga

- Gutanga amatungo magufi, inkoko n’ingurube

- Gushyiraho  amasomero rusange (community libraries)

- Guhugura imiryango ibanye nabi

- Kubaka Umuyoboro w’amazi wa Kabarondo

Mu isuzuma riherutse (Gicurasi 2025) ryakorewe abafatanyabikorwa b'Akarere ka Ngororero bibumbiye muri JADF Isangano, Food for the Hungry yashimiwe gukorana neza n'inzego z'ibanze, Ownership ku baturage ku bikorwa byakozwe; abagenerwabikorwa babigize ibyabo bizatuma biramba (Sustainability); abaturage bishimira ibikorwa byakozwe kuko bisubiza ibibazo bafite, ibikorwa byose byari biteganyijwe byarakozwe.

Food for the Hungry yagejejweho icyifuzo cyo kwagurira ibikorwa mu yindi mirenge kuko ibyo ikorera mu murenge wa Bwira bigaragaza impinduka nziza ku bagenerwabikorwa no gukomeza gukorana neza n’ubuyobozi bw’Inzego z’Ibanze 

Uyu mwaka FFH ifite ingengo y'imari ingana na 221,066,914 frws, imaze gukoresha 133,463,976 bingana na 60,3%