Akarere ka Ngororero gafite ejo heza ku bijyanye no guhangana n'imihindagurikire y'ikirere n'ibihe.
Iki cyizere gikomoka ku bufatanye n'umufatanyabikorwa BRAC International ugamije kwegera abaturage akabafasha kugira uruhare mu guhangana n'imihindagurikire y'ibihe babigizemo uruhare.
Ni muri urwo rwego BRAC International Rwanda yatangiye gushyiraho komite zitorwa kuva ku Karere kugeza ku kagari  (District Planning Adaptation Committee/DAC, Sector Planning Adaptation Committee/SAC, Cell Planning Adaptation Committee/CAC )
Izi komite zimaze gutorwa mu mirenge ya Bwira, Kabaya,  Kageyo,  Ndaro,  Sovu na Muhanda zifite inshingano zo kugaragaza uruhare rw'abaturage mu guhangana n'imihindagurikire y'ibihe:
Mu kagari hazava ibitekerezo n'imishinga bizashyikirizwa umurenge ugatoranyamo iby'ingenzi. Umurenge nawo ukabishyikiriza Akarere kazavanamo iby'ingenzi bazajya ku rwego rw'Igihugu.
Imishinga izatoranywa izaterwa inkunga yo kuyishyira mu bikorwa na BRAC International binyuze mu kigega Pro- Poor Basket Fund kiba muri LODA.

Iki gikorwa gihagarariwe na Bwana Nshimiyimana Jean Piere  umukozi wa Brac International ushinzwe gukurikirana ibikorwa byayo mu Karere ka Ngororero na Nyabihu.
Utu Turere nitwo twatoranijwe ku ikubitiro, umushinga ukazakomereza mu Turere 16.

Uretse BRAC International Rwanda Akarere ka Ngororero gafite umufatanyabikorwa ARCOS Network ufite gahunda y'igihe kirekire yo kurengera ibidukikije mu gihe cy'imyaka 30. iyi gahunda izashyirwa mu bikorwa n'umushinga MuLaKiLa (Mukura Forest and Lake Kivu Catchment Landiscape) 

Ni umushinga  ugamije kubaka uguhangana n’imihindagurikire y’ikirere no kongerera gaciro ibikomoka ku buhinzi muri sisitemu y’ubuhinzi ikikije ishyamba rya Mukura n’ahantu nyaburanga hafashwe n’ikiyaga cya Kivu mu turere twa Rutsiro na Ngororero. Ni gahunda y’ubufatanye yashyizwe mu bikorwa na Albertine Rift Conservation Society (ARCOS), umuryango wo kubungabunga no guteza imbere urusobe rw'ibinyabuzima mu Karere, hamwe na Reforest'Action, isosiyete yo mu Bufaransa ifite intego yo kubungabunga, kugarura no gushyiraho urusobe rw’ibinyabuzima by’ubuhinzi; hirya no hino ku isi mu gufasha guhangana n’imihindagurikire y’ikirere no gutakaza urusobe rw’ibinyabuzima; no ku bufatanye na Guverinoma y’u Rwanda n’abandi bafatanyabikorwa. Uyu ni umushinga wimyaka 30 watangijwe muri Werurwe 2023.

Intego:

Uyu mushinga urateganya kubaka uguhangana n’imihindagurikire y’ikirere, gufatanya n’abaturage mu kugarura hegitari 21.000 z’ubuhinzi bwangiritse binyuze mu gutera ibiti 6.000.000, guteza imbere imicungire y’ubutaka burambye binyuze mu materasi n’ubundi buryo butandukanye  bubungabunga ibidukikije. 

Uyu mushinga kandi uzamura imibereho y’abahinzi 160.000 babikesheje guteza imbere ibiti, ikawa, kongerera agaciro imbuto, guhanga imirimo no gutera inkunga imishinga iciriritse ikikije ishyamba rya Mukura-Gishwati n’ahantu nyaburanga hafashwe n’ikiyaga cya Kivu mu turere twa Rutsiro na Ngororero. Niyo mpamvu umushinga uzagira uruhare muri SDGs zikurikira:

 1.  Kurandura ubukene burundu; 

2. Kurandura nzara burundu;

3. Uburezi bufite ireme;

4. Uburinganire bw’umugabo n'umugore;

5. Akazi keza no kuzamuka mu bukungu; 

6. Ibikorwa bitangiza ikirere;

7. Ubuzima bw'ubutaka n'izindi gahunda zigihugu ndetse n'isi yose. 

Akarere ka Ngororero kari mu turere twibasirwa n'Imihindagurikire y'ibihe bikurura ibiza bihitana ubuzima bw'abantu bikangiza n'imitungo.