Umuyobozi w'Akarere wungirije ushinzwe iterambere ry’ubukungu Bwana UWIHOREYE Patrick  ari kumwe n'Umunyamabanga Nshingwabikorwa w'Akarere Bwana BAHIZI Emmanuel n'Umuyobozi w'imirimo rusange Bwana NDAYIKENGURUKIYE Jean Luc bitabiriye amahugurwa y'iminsi 2 yateguwe ku bufatanye bw'Akarere n' umufatanyabikorwa BRAC International  agamije kongerera ubumenyi Komite ishinzwe guhangana n'ingaruka z'imihindagurikire y'ikirere  buzabafasha kurangiza neza inshingano zabo.
Aya mahugurwa agamije kandi kugeza ku bayitabiriye ibyavuye mu ikusanyamakuru ku ngaruka z'imihindagurikire y'ikirere  ndetse no gukora raporo y'imishinga yatanzwe n'imirenge abaturage babigizemo uruhare.
Amahugurwa agamije kandi  gufasha izi komite gutegura imishinga yo guhangana n'imihindagurikire y'ikirere umuturage abigizemo uruhare.

Muri aya mahugurwa hazaboneka umwanya wo guhuza no gukora raporo inoze y'imishinga yatanzwe n'imirenge ya Sovu, Kavumu, Ndaro, Kabaya, Bwira , Muhanda na Kageyo.
Akarere ka Ngororero kari mu Turere tuza imbere mu kugirwaho ingaruka zikomeye ziterwa n'imihindagurikire y'ikirere.

Ku munsi wa 2 w'amahugurwa ari nawo wanyuma yateguwe ku bufatanye bw'Uturere twa Ngororero na Nyabihu n'umufatanyabikorwa Brac International, abitabiriye amahugurwa bakoreye mu matsinda bakora raporo z'Imishinga  yo guhangana n'imihindagurikire y'ikirere yatanzwe n'Abaturage mu mirenge itandukanye (7 mu KarerekaNgororero na 6 mu Karere ka Nyabihu).
Mu Turere twombi hatanzwe imishinga ijyanye n'amazi, ingufu z'amashanyarazi, imihanda yo kugeza umusaruro ku isoko; ubuhinzi n'ubworozi, uburezi, ubuzima, kubungabunga ibidukikije, guteza imbere urwego rw'abikorera no kurengera abatishoboye.... Imishinga igera kuri 17 yavuye mu baturage mu Karere ka Ngororero izatwara by'agateganyo agera kuri 98,687, 462, 613 frws
naho imishinga 10 yo mu Karere ka Nyabihu  izatwara by'agateganyo agera kuri 93,178,836,172 frws. Iyi mibare izanonosorwa.

Amahugurwa yitabiriwe na n'abayobozi b'amashami (ubuhinzi n'ubworozi, ubutaka n'ibikorwaremezo, imari, imibereho myiza, igenamigambi), bamwe mu bakozi b'Akarere, uhagarariye inama y'Igihugu y'urubyiruko, uhagarariye inama y'Igihugu y'abafite ubumuga n'intumwa y'urugaga rw'Abikorera.
Yashojwe n'Umuyobozi wungirije w'Akarere ka Nyabihu ushinzwe iterambere ry’ubukungu Bwana Habanabakize Jean Claude  washimiye umufatanyabikorwa BRAC International kuba aharanira gufasha abaturage guhangana n'ingaruka z'imihindagurikire y'ikirere binyuze mu mishinga yateguwe n'abaturage ubwabo.
Yijeje ubufatanye buhoraho kugira ngo iyi mishinga izashyirwe mu bikorwa mu guharanira gushyira umuturage ku isonga.