Ambasaderi wa Zimbabwe mu Rwanda Madam Professor  Charity MANYERUKE yasuye ikigo cy'amashuli cya TTC MURAMBA giherereye mu murenge wa Matyazo mu rwego rwo gutsura umubano mwiza usanzwe hagati y'u Rwanda na Zimbabwe.
By'umwihariko  yaje kuganira n'abalimu b'abanyazimbabwe 6 (abagore 2 n'abagabo 4) bigisha muri iri shuli amasomo y' Icyongereza, uburezi budaheza  (special need education),  amahame remezo y'uburezi abafasha kwinjira mu mwuga wabo w'uburezi (foundation of education).
Yakiriwe n'Umuyobozi w'Akarere Bwana nkusi Christophe ari kumwe n'abayobozi b'inzego z'umutekano, Umuyobozi w'ishami ry'uburezi, Umuyobozi wa TTC MURAMBA, abalimu n'abanyeshuli.
Abalimu bamugaragarije ko bishimiye uburyo babayeho butuma barangiza neza inshingano bahamagariwe.
Abanyeshuli nabo bagaragaje ko banyurwa n'ubumenyi bahabwa n'aba balimu bafite ubunararibonye.
Umuyobozi w'ishuli Bwana Butera Jean Claude yashimye umubano mwiza hagati y'ibihugu byombi ugaragarira by'umwihariko mu burezi bwahinduye ipaji mu mateka y'imyigishirize muri iri shuli.
Umuyobozi w'Akarere @cnkusi20 yashimiye umubano mwiza hagati y'u Rwanda na Zimbabwe ugaragarira mu bice bitandukanye birimo ubuhinzi, ubucuruzi, uburezi, ubukerarugendo,....ashimira ubuyobozi bwiza bw'Igihugu cyacu bwimakaje umubano w'u Rwanda n'amahanga.
Ambasaderi  Professor  Charity MANYERUKE nawe yagarutse ku mubano mwiza uranga u Rwanda na Zimbabwe ashimangira adashidikanya ko uzakomeza gutera imbere mu nyungu z'abaturage b'ibihugu byombi. Yashimiye aba Perezida n'ibihugu byombi badahwema guharanira imibereho myiza y'abaturage n'iterambere ry'Afurika muri rusange.