Muri iyi minsi hagaragayemo akajagari mu nsengero zimwe na zimwe zitutjuje ibisabwa ngo abayoboke bazo baterane mu mudendezo; hafashwe ingamba zo kuzihagarika ngo zibanze zijye ku murongo uboneye. Byagaragaye ko hari aho insengero zagiye zubakwa ku buryo bukomeye ariko ugasanga ibyangombwa bijyana nazo ntabihari ndetse n'ibihari ugasanga ntibyujuje ubuziranenge: ahenshi nta bwiherero buhagije buhari usanga ari uturyango 2 natwo twubatse ku buryo butarambye, nta mazi ahagera, nta murindankuba, nta ntebe zihagije n'ibindi. Ibi bikaba bibangamiye umutekano ugomba kuranga ahantu hahurira abantu benshi. 

Ni muri urwo rwego Umunyamabanga Nshingwabikorwa w'Intara y'Uburengerazuba Madamu UWAMBAJEMARIYA Florence yagiriye uruzinduko rw'akazi mu Karere ka Ngororero aho yaje kureba ko ibyasabwe amadini n'amatorero kugirango akomeze gukora byubahirijwe.
Nyuma yo gusura umusigiti mu murenge wa Ngororero na centrale gatolika mu mu murenge wa Muhanda, Madamu Uwambajemariya yibukije ba nyir'amadini n'amatorero ko ahantu hahurira abantu benshi nko mu nsengero hagomba kuba hijuje ibyangombwa kugira ngo abantu bahagirire umutuzo n'umutekano bisesuye.
 Yabasabye ko ibyangombwa bitarubahirizwa byakuzuzwa bakongera gufungurirwa imiryango.

Yagize ati: "kwaba ari ugukinisha ubuzima bw'abayoboke bacu kubateranyiriza ahantu hashobora gushyira ubuzima bwabo mu kaga. Twirinde gukora  ibitujuje ubuziranenge ahubwo tubigire ibyacu n'umutima wacu wose" .

Muri uru ruzinduko  Madamu UWAMBAJEMARIYA yari kumwe n'itsinda ririmo umuyobozi wa Police n'uwa RIB ku rwego rw'intara, umuyobozi w'Akarere Bwana NKUSI Christophe n'abayobozi b'inzego z’umutekano zikorera mu Karere.

Mu Karere ka Ngororero harabarurwa insengero 509 muri zo izujuje ibisabwa ni mbarwa.