Abagize Urugaga rw'Abikorera (PSF) mu Ntara y'Iburengerazuba basuye urwibutso rwa Jenoside yakorewe Abatutsi rwa Kibirira mu murenge wa Gatumba banaremera inka zo korora imiryango 10 y'Abarokotse Jenoside. Banatanze inkunga yo gutunganya ibikorwa byo kubungabunga urwibutso.

Bari bayobowe na Perezida w'uru rugaga Bwana  NKURUNZIZA Ernest  ari kumwe na BISENGIMANA Denys Umuyobozi w'Ishami ry'Imiyoborere Myiza mu Ntara y'Iburengerazuba.

Iri tsinda ryakiriwe n'Umuyobozi w'Akarere Bwana NKUSI Christophe ari kumwe n'Umuyobozi w'Akarere Wungirije Ushinzwe Iterambere ry'Imibereho Myiza y'Abaturage Madamu MUKUNDUHIRWE Benjamine, Abayobozi mu Nzego z'Umutekano zikorera mu Karere ka Ngororero n'Abikorera bahagarariye abandi mu nzego zitandukanye mu Karere ka Ngororero.

Mbere yo kunamira inzirakarengane ziruhukiye muri uru rwibutso, basobanuriwe inzira y'umusaraba izi nzirakarengane zanyuze n'uburyo bishwe urwagashinyaguro. Umutangabuhamya Pasteur Kabanda Aimable warokotse Jenoside yagarutse ku mbwirwaruhame ya Leon Mugesera yavugiye ku Kabaya ikaza gukongeza  ubwicanyi bwaberaga muri Kibirira aho akomoka.

Umuyobozi wa PSF ku Ntara y'Iburengerazuba  yavuze ko uru ruzinduko rwatumye bamenya kurushaho amateka ya Jenoside yakorewe Abatutsi mu cyahoze ari komini Kibirira. Barateganya gusura uturere twose tw'Intara y'Iburengerazuba.
Umuyobozi w'Akarere Bwana Nkusi Christophe yihanganishije abarokotse Jenoside yakorewe Abatutsi abashimira uburyo bagenda biyubaka batanga umusanzu wabo mu kwiyubakira Igihugu.

Yanashimiye Urugaga rw'Abikorera mu Ntara y'Iburengerazuba kuba baje gufata mu mugongo abarokotse. Ati ni ikimenyetso ko batari bonyine kandi ni imbaraga zibongerera ubushobozi bwo kwiteza imbere.
Yagaye ubuyobozi bubi bwaroshye u Rwanda mw'icuraburindi anashimira ubuyobozi bwiza bwatumye igihugu kitazima ubu abanyarwanda bakaba barahisemo kuba umwe baharanira iterambere rirambye..
Urwibutso rwa Kibirira ruruhukiyemo inzirakarengane
24,723