Uyu munsi kuwa 8/12/2022 ku bufatanye bw'afatanyabikorwa, urubyiruko rw'abakorerabushake, police y'u Rwanda DPU Ngororero yasubukuye gahunda ya "GERAYO AMAHORO" mu rwego rwo kurwanya impanuka mu muhanda. Umuyobozi wa Police DPU ya Ngororero yavuze ko iyi gahunda yatangijwe mu Rwanda kuri 13/05/2019 ikaza gukomwa mu nkokora na Covid-19.

Yashimiye abatwara ibinyabiziga kuba impanuka zaragabanutse maze akebura abatwara moto n'amagare kuko bagikurura  impanuka nyinshi. Yabibukije gukoresha umuhanda neza batitwaje ngo  ni "ba munyurahato". Yagize ati: "mwirinde impahamyi y'amafaranga ahubwo muharanire kugerayo amahoro. Gukomeza gusunikwa sibyo, buri wese agire uruhare mu mutekano mwiza wo mu muhanda."
Umuyobozi w'Akarere Bwana Nkusi Christophe wasubukuwe ku mugaragaro iyi gahunda ya GERAYO AMAHORO yibukije ibitera impanuka birimo uburangare nko kuvugira kuri telefoni utwaye ikinyabiziga, kutubahiriza amategeko y'umuhanda, gutwara wafashe ku bisindisha... Yagarutse ku bubi bw'impanuka nko gutakaza ubuzima no kwangiza ibidukikije birimo ibikorwa remezo, guhombya Igihugu imbaraga zubaka, guteza imiryango ingorane z'ubukene...
Yasabye abatwara ibinyabiziga gukomera kw'isuku yo ku myambaro y'akazi no ku mubiri. Abagenzi nabo basabwe gukoresha neza umuhanda igihe bawambukiranya cyangwa babisikana n'ibinyabiziga.

Yanabakanguriye kugira uruhare mu kurwanya imirire mibi n'igwingira bagafasha imiryango ibegereye mu gukemura iki kibazo kibangamiye imibereho myiza. Yagize ati: " ntimwakora akazi mwaragwingiye cyangwa ngo mutware abagwingiye." Basabwe no kugira uruhare mu kurwanya ruswa n'akarengane nk'abantu batwara abantu benshi banafite amakuru atandukanye, bagatungira agatoki inzego zibishinzwe. Igikorwa cyitabiriwe kandi n'abayobozi b'inzego z'umutekano zikorera mu Karere cyashojwe no komeka ibyapa bya GERAYO AMAHORO ku binyabiziga.