Kuwa 20/03/2024 habaye igikorwa cyo gutaha ku mugaragaro Umushinga wo kubaka umuyoboro w’amazi w'Akarere ka Ngororero (Construction of Ngororero Water  Supply System) (Muhembe, Nyamyotsi and Nyirarongero Water Supply Systems).

Ni umwe mu mishinga migari  mu Karere ka Ngororero  wuzuye utwaye miliyari 9,310,517,102 Frw.
Ni umushinga ufite ubushobozi bwo gutanga amazi avuye mu nganda eshatu (3) zifite ubushobozi bwa  meterokibe 3,460 ku munsi.

Uyu mushinga wakorewe mu mirenge itandatu ariyo Muhanda, Kabaya, Hindiro, Kavumu, Sovu, Kageyo na Ngororero  wazamuye ijanisha ry’abaturage bafite amazi meza muri iyi mirenge  ku kigero cya 65.9% bingana n'abaturage 130,200 kuri 197,702.
Mu Karere kose hiyongereyeho 10.4% kuko kavuye kuri 68.6 % kagera kuri 79%.

Uyu mushinga wagejeje amazi ku bigo by’amashuri 12, amavururo mato 5, centres z’ubucuruzi zisaga 7, n’inyubako za Leta 3.
Worohereje abaturage gufata amazi mu ngo nk'uko politike y’igihugu ibiteganya.

Batanze ubuhamya bw'uko bishimiye akamaro k'uyu muyoboro: Nyiranshuti Delphine wo mu kagari ka Mugano ati abana bacu barabohowe, ubu bariga neza kuko bavoma hafi. ijerikani ya litro 20 bayiguraga 200 frws ariko ubu  ijerikani 10
ni  ikuvuga litiro 200 ziragura amafaranga 100 gusa.

Kubera ko abaturage bangana na 21% bataragezwaho amazi meza,  ubufatanye bw’inzego zitandukanye buzakomeza kugira ngo NST2 izarangire abaturage b’Akarere ka Ngororero bafite amazi meza  100%.
Muri rusange uyu mushinga wabereye abaturage b’Akarere ka Ngororero ingirakamaro: Mu gihe cy’amezi 25 wamaze ukorwa, wazamuye imibereho y’abaturage kuko abasaga 3,460 babonye akazi.
Muribo 1,223 ni urubyiruko.
Abagenerwabikorwa biyemeje gukorera hamwe mu kubungabunga uyu mushinga kugira ngo uzabashe kuramba.
Umuyoboro utashywe mu gihe hizihizwa icyumweru cyahariwe amazi ku isi.
Uje ushimangira ubufatanye bwa Leta y'u Rwanda n'abafatanyabikorwa nka Banki Nyafurika Itsura Amajyambere (BAD).
Abagenerwabikorwa basabwe kubungabunga uyu muyoboro bawurinda kwangirika.
Umuyobozi mukuru ushinzwe amazi isuku n'isukura muri Minisiteri y'Ibikorwa remezo Madame  Gemma ManiraritA!niwe wari umushyitsi mukuru. Yagize ati: "turi abakozi b'abaturage tukaba twishimira kubagezaho ibikorwa remezo bifuza. Aya mazi muyabyaze umusaruro w'igihe mwatakazaga mujya kuvoma, mwimakaze isuku ahantu hose, mwirinde indwara ziterwa n'umwanda mukaraba intoki kenshi."
Igikorwa cyitabiriwe kandi n'Umuyobozi Mukuru wa WASAC Group Prof. Omar Munyaneza, intumwa ya BAD yateye inkunga uyu mushinga, intumwa za company BAOYER yubatse uyu muyoboro.

Bakiriwe n'Umuyobozi w'Akarere Wungirije Ushinzwe Iterambere ry’ubukungu Bwana UWIHOREYE Patrick wari kumwe n'abayobozi n'abaturage b'umurenge wa Ngororero.

GUTAHA UMUYOBORO W'AMAZI MU MAFOTO