Umuyobozi w'Akarere Bwana Nkusi Christophe yayoboye igikorwa cyo gutaha ku mugaragaro ibiro bishya by'Akagari ka kazabe mu murenge wa Ngororero. 
Abaturage bishimiye ibiro bishya bazajya baherwamo sarivisi zinoze. Ni inyubako irimo n'ibiro by'abajyanama b'ubuzima. 
Umuturage uhagarariye abandi yashimiye ubuyobozi bwiza bw'Igihugu cyacu budahwema kuzirikana umuturage bityo agahora ku isonga. 
Umuyobozi w'Akarere Bwana NKUSI Christophe yagarutse ku bikorwaremezo abaturage bahawe asaba ko babisigasira bikabyara umusaruro byitezweho.
Yashimiye Nyakubahwa Perezida wa Repubulika Paul Kagame udahwema kuzirikana ibikorwa biteza umuturage imbere.

Mayor Nkusi yasabye ubuyobozi bw'Akagari gukomeza kunoza imitangire ya serivisi.
Abaturage bashimiwe uruhare bagize kugirango ibi Biro by'Akagari byuzure.
Mayor NKUSI yabibukije ko “tugiye kwinjira mu bihe byo kwibuka ku nshuro ya 31 Jenoside yakorewe Abatutsi mu 1994” abasaba kuzabyitabira baca ukubiri nk'ingengabitekerezo ya Jenoside kandi bamaganira kure  abashaka kuyibiba hifashishijwe ikoranabuhanga. 

Mayor Nkusi yanamenesheje abaturage ko umuhanada uhuza Uturere twa Ngororero na Rutsiro n'uhuza Uturere twa Ngororero, Nyabihu, Musanze, Burera ukagera ku mupaka wa Uganda unyuze mu Cyanika igiye kubakawa neza igashyirwamo kaburimbo.

Ni inkuru yateye abaturage ibyishimo bakomeza gushimira Ubuyobozi bwiza buhora buzirikana kwegereza abanyarwanda ibikorwaremezo. Vuba haherutse gutahwa umuyoboro mugari w'amazi yakwirakwijwe mu mirenge 6, ubu kandi harimo kubakwa umuyoboro mugari w'amashanyarazi uzasiga hejuru ya 93% by'abaturage bafite ingufu z'amashanyarazi.
Nyuma yagiranye ikiganiro n'abavuga rikumvikana mu kagari ka Kazabe abasaba gusigasira indangagaciro nyarwanda kandi bagashyira umuturage ku isonga.