Kuwa 18/12/2024 mu cyumba cy'inama cya Paroisse ya Rususa habaye ibiganiro bigamije kwimakaza Ubumwe n'Ubudaheranwa mu rwego rwo gusuzuma ibibazo by'ingenzi abarokotse Jenoside yakorewe Abatutsi bahura nabyo n'ingamba zo kubishakira ibisubizo.

Ibiganiro byahuje imiryango iharanira inyungu z'abarokotse Jenoside yakorewe Abatutsi,  abahagarariye abarokotse Jenoside yakorewe Abatutsi mu Karere ka Ngororero, intumwa za MINUBUMWE  ziyobowe na Madame
Uwera Marie Umuyobozi w'ishami ry'Ubumwe n'Ubudaheranwa muri Minubumwe, visi perezidante wa AVEGA ku rwego rw'Igihugu, intumwa za IBUKA, intumwa ya RBC mu ishami rishinzwe ubuzima bwo mu mutwe, Komite Nyobozi y'Akarere, abayobozi b'Inzego z'Umutekano zikorera mu Karere,  Abanyamabanga Nshingwabikorwa b'Imirenge,  n'abashinzwe imibereho myiza mu mirenge.

Abagenerwabikorwa basobanuriwe ibijyanye n'inkunga bahabwa, uburyo batoranywa n'inzitizi zikiboneka.
Basabwe gukoresha neza izi nkunga  zikabafasha mu kwiteza imbere bagatera intambwe y'ubudaheranwa.

Iyi ntambwe baraharanira kuyigeraho nk'uko bisobanurwa na Nyiranshuti Delphine wo mu murenge wa Ngororero, akagari ka Mugano washoboye gucunga neza inkunga yahawe Na Minisiteri y'Ubumwe bw'Abanyarwanda n'Inshingano Mboneragihugu ubu akaba amaze kwiteza imbere. 

Nyiranshuti avuga ko yagenewe inkunga y'ibihumbi 500 akayibyaza umusaruro abikesha amahufurwa we na bagenzi be bahawe n'umuryango SEVOTA. Yatangiye ku bucuruzi buciriritse bw'imyaka, arangura ibishyimbo by'ibihumbi 300 bimubyarira bihumbi 800 atangira kgemurira ibigo by'amashuli. Ngo yahise ajya kwaka inguzanyo mu murenge SACCO bamuha miliyoni 2 yongeraho make agura moto nshyashya. Ubu irakora neza yamushoboje kwishyurira abana 3 amashuli no kwishyura umwenda w'umurenge SACCO. Aragira ati kwitinyuka  nibyo bya mbere ibindi bikaziraho. Arashimira MINUBUMWE asaba bagenzi gukoresha neza inkunga bahabwa bakagera ku Ubudaheranwa.

Abitabiriye banahawe ikiganiro ku buzima bwo mu mutwe, uburyo abagifite agahinda n'intimba bagobokwa kugirango bitababera intandaro yo  gusigara mw'iterambere "twifuza."
Ubushakashatsi bugaragaza ko abarokotse Jenoside yakorewe Abatutsi  bagifite ihungabana ku kigero cya 27,9% .
Bahawe kandi ikiganiro ku micungire y'imishinga baterwamo inkunga na Minubumwe. Basabwe gucunga neza imishinga ku buryo ibafasha gutera intambwe yo kwigeza ko rwego rwo kwifasha.
Mu bibazo bikibangamiye ubumwe n'ubudaheranwa muri rusange, n'abarokotse Jenoside yakorewe Abatutsi by'umwihariko harimo
amacumbi adahagije n'agomba gusanwa,  ingengabitekerezo ya Jenoside (13 mu mezi 3), imanza za gacaca zitararangizwa, abakatiwe n'inkiko gacaca batarangije ibihano, ubushomeri mu rubyiruko, inkunga y'ingoboka idahagije,...

Nyuma yo Kungurana ibitekerezo izi mbogamizi zahawe umurongo.