Umuyobozi w'Akarere Bwana NKUSI Christophe yayoboye inama y'abakozi b'Akarere mu rwego rwo kungurana ibitekerezo ku bijyanye n'Umunsi mpuzamahanga w'umurimo utarizihijwe tariki ya 1/05 kubera inshingano nyinshi zagobotse.

Muri iyi nama Meya Nkusi yagarutse ku bigomba kuranga umukozi birimo imitekerereze, imikorere n'imyitwarire ijyanye n'urwego akoramo.
Aha yashimiye intambwe imaze guterwa nk'uko  bigaragara ku ntonde zikorwa n'inzego zitandukanye zikuriye Akarere.
Yasabye abakozi gukomeza imyitwarire mbonezamurimo na mbonezamusaruro bityo "tugakomeza guhagarara neza mu nshingano twahawe n'Ubuyobozi bwiza bw'Igihugu cyacu."
Muri iyi nama umuyobozi w'ishami ry'imicungire y'abakozi n'ubutegetsi yatanze ikiganiro cyibutsa abakozi amahame mbonezamurimo agomba kuranga umukozi wa Leta kugira ngo arangize neza inshingano ze:
- Ubudashyikirwa n'ubunyamwuga
- Ubunyangamugayo no kwizerwa
- Kubazwa inshingano
- Kwita ku bagenerwa serivisi
- Kutabogama
- Gukorera mu mucyo n'ubufatanye
- Gukorera ku ntego no kugera ku musaruro.
Havuzwe kandi ku burenganzira bw'umukozi.

Umuyobozi w'Akanama ka Discipline yatanze ikiganiro cyibutsa abakozi  amakosa bagomba kwirinda n'ibihano biteganyirizwa uwateshutse ku nshingano ze.
Muri ibi birori hatowe  umukozi w'indashyikirwa. Ni Umuhoza Aimé Monique umukozi wo mubunyamabanga rusange bw'Akarere.
Mu kuzirikana abarokotse Jenoside yakorewe Abatutsi mu 1994 batishoboye abakozi biyemeje  kuremera umwe muri bo inka ihaka.