Uyu munsi Inama isanzwe y'Inama y'Igihugu y'Abagore ku rwego rw'Akarere ka Ngororero yateranye  ku nsanganyamatsiko igira iti:" Tinyuka mugore urashoboye: twubake umuryango ushoboye kandi utekanye."
Inama yibanze ku bibazo bibangamiye imibereho myiza y'abaturage  n'uburyo byabonerwa ibisubizo.
Muri byo harimo imirire mibi n'igwingira, ihohoterwa rishingiye ku gitsina, inda ziterwa abangavu imburagihe, amakimbirane mu miryango, isuku idahagije, imyumvire itajyanye n'igihe,....
Inama yasuzumye ibyagezweho muri 2021/2022 n'ibizakorwa 2022/2023.

Basanze ba Mutimawurugo bafite uruhare rukomeye mu gukemura ibi bibazo.
Vice Mayor Mukunduhirwe Benjamine yavuze ko  iyo Mutima w'urugo  afite imibereho myiza, urugo ruba rutekanye. Ati dutewe ipfunwe no kuba ingo za bamwe muri twe zikirangwamo ibibazo bibangamiye ubusugire bw'ingo nk' imirire mibi n'igwingira. Ati dusigeho gutenguha Nyakubahwa perezida wa Repubulika waduhesheje agaciro ubu tukaba tuvuga rikumvikana.

Umushyitsi mukuru muri ibi birori yari Hon. Depite Manirarora Annoncée wakebuye abitabiriye inama avuga ko bidakwiye ko mu gihe tugezemo haba hakiboneka ibibazo bibangamiye imibereho myiza y'umuryango kandi abagore bakagombye kubibonera ibisubizo. Aha yagize ai: " Ni igisebo kuri twe kuba Umukuru w'Igihugu cyacu atugenera ibyangombwa byose kugirango imiryango yacu isugire ariko ugasanga hakiri ingo zikigaragaramo imirire mibi,igwingira, amakimbirane, isuku nkeya,...Muze twiyambure iki gisuzuguriro"
Inama yaranzwe n'ubuhamya bw'abagore biteje imbere, biganiro butandukanye birimo kurwanya ihohoterwa rishingiye ku gitsina, kwirinda amakimbirane mu miryango, kwita ku burere bw'abana, umutekano n'ibindi.
Yitabiriwe kandi na bamwe mu bajyanama mu nama Njyanama y'Akarere, abikorera (PSF), n'abayobozi b'inzego z'umutekano. Mu karere ka Ngororero abagore bagera kuri 53% by'abatuye aka Karere.

Abagore basinyanye n'ubuyobozi bw'Akarere n'imirenge imihigo ikubiyemo uruhare rwabo mu gukemura ibibazo bibangamiye imibereho myiza y'umuryango.