Umunsi mpuzamahanga w'umugore wizihijwe mu mirenge yose igize Akarere ka Ngororero. Ku rwego rw'Akarere wizihirijwe mu murenge wa Nyange. Umuyobozi w'Akarere Bwana Nkusi Christophe, inzego z'umutekano, abafatanyabikorwa bifatanije n'abaturage kwizihiza uyu munsi. Umushyitsi mukuru yari Hon. Depite  Manirarora Annoncée.
Umunsi waranzwe n'imurikabikorwa abagore bagezeho, ubuhamya bw'uko  biteje  imbere no kuremera hatangwa inka, imashini zidoda, amashyiga ya cana rumwe, ibitenge n'ibindi...
Ubuhamaya bwatanzwe ni ikimenyetso ko abagore batinyutse ubu bakaba bashoboye:

Souvenir Jeannette ni umuyobozi w'umudugudu wa Vungu mu kagari ka Nsibo yavuze k'uburyo yitinyutse akinjira mu nzego z'ubuyobozi. Afite umuturage Mukazibera Devota ushaka kuva mu kiciro cya mbere akajya mu cya 2  abikesha inkunga yahawe na World Vision yacunze neza  ikamuteza imbere.

Ahereye kunsangamatsiko y'umunsi "Ubwuzuzanye n'uburinganire mu guhangana n'imihandagurikire y'ikirere",  Souvenir Jeannette arashishikariza bagenzi be gukoresha gaz cyangwa amashyiga arondereza ibicanwa ntibahore bashya amaso bicwa n'imyotsi.

Presidente w'Inama y'Igihugu y'Abagore mu Karere ka Ngororero Madame Mukeshimana Marie Claire yashyize ahagaragara imihigo ya Mutimawurugo ishingiye ku kurwanya imirire mibi n'igwingira, isuku n'isukura, kurwanya amakimbirane mu ngo, gushishikariza abana bose kwitabira ushuli n'iyindi...
Umuyobozi w'Akarere yatinze ku nsangamatsiko ashishikariza abategarugori gukoresha ibicanwa bitangiza ikirere cyangwa ngo bigire ingaruka mbi ku buzima bwabo nko kubakururira indwara z'ubuhumekero.

Yagarutse ku ruhare rwa Mutimawurugo mu kurwanya imirire mibi n'igwingira ategura indyo yuzuye,  yita kw'isuku, asubiza abana mw'ishuli ku barivuyemo, kugira umuryango uzira amakimbirane, kugira abana bafite uburere .... Yashimiye abagore intambwe bamaze gutera biteza imbere abasaba gukomera mu ngamba bafatanije n'abagabo.Yanagize ati:"abagore mubishatse igwingira ryaba amateka mu Karere kacu"

Umushyitsi mukuru Hon. Manirarora nawe yagarutse ku ruhare rw'umugore mw'iterambere abasaba kurwanya imirire mibi bivuye inyuma; bwaki ikaba amateka mu Karere ka Ngororero. Yasabye abategarugori bagenzi be guhora bazirikana amahirwe bahawe na Nyakubahwa Perezida wa Repubulika agakomeza kubabera isoko bavomaho.