Uyu munsi muri video conference y'Akarere habereye inama yahuje ubuyobozi bw'Akarere n'abagenzuzi b'amashuri ba Mineduc mu rwego rwo gusoza igikorwa cy'ubugenzuzi bw'ibyumba by'amashuri byubatswe mu Karere ka Ngororero cyatangiye kuwa 20/02/2020 kugeza uyu munsi.
Inama  yayobowe n'umuyobozi w'Akarere Bwana NDAYAMBAJE Godefroid.

Abagenzuzi bahawe umwanya kugaragaza uko basanze byifashe. Bavuze ko basuye ibigo by'amashuri 20 biri mu Mirenge 11 kuri 13 igize Akarere ka Ngororero
Mubyo barebaga harimo:

-kureba aho imirimo igeze kugeza ubu
-kureba ibijyanye n'imyubakire
- kureba uko ibikoresho byagiye bikoreshwa kugira ngo harebwe aho ibikoresho byashize kandi imirimo itarangiye n'impamvu zabyo, izo mpamvu zikaba zazashingirwaho harebwa uko ibibura byakongerwa kugira ngo imirimo irangire.

Abagenzuzi bagaragaje ko muri rusange aho imirimo igeze bigaragara ko hari icyakozwe ariko bagaragaza ko hari ahagiye hari amakosa amwe n'amwe basaba ko yakosorwa kuko bishoboka.

Umugenzuzi w'amashuri muri Mineduc waje ayoboye itsinda yagarutse ku myigishirize aho yavuze ko hari abarimu badakoresha ibidanago (journaux de classe) ndetse anavuga ku bigo bifite abarimu benshi batize uburezi.

Aha umuyobozi w'Akarere yasabye ushinzwe uburezi mu Karere kubikurikirana kugira ngo buzakosorwe.
Nyuma abandi bari mu nama bahawe umwanya wo gutanga ibitekerezo

Umukozi ushinzwe ibikorwa remezo mu Karere yagaragaje ko bitewe n'imiterere y'Akarere hari aho ibikoresho byagiye biba bike  kubyari   biteganyijwe aboneraho gusaba ko hakorwa ubuvugizi ibibura bikazatangwa.
Yanaboneyeho gusaba ko muri raporo y'abagenzuzi hajyamo n'ubuvugizi bwo kuzatanga ibigega bifata amazi kuko bitigeze biteganywa ndetse no kureba uburyo haboneka vuba uburyo bwo kubaka inkuta zifata ubutaka mbere y'uko imvura igwa kuko hari ibigo biri ahantu hakeneye inkuta byihuse.
Inama yarangiye umuyobozi w'Akarere ashimira abagenzuzi kubwo kugaragaza uko Akarere gahagaze mu myubakire y'amashuri anabizeza ko hakomeza kuba ubugenzuzi  bw'imbere mu karere kugira ngo ibyifuzo nama byatanzwe byitabweho ndetse n'amakosa yagaragajwe akosorwe.