Abafatanyabikorwa  mw'iterambere ry'Akarere ka Ngororero JADF Isangano bagize umwiherero w'iminsi 3 (7-9/09/20221). Hamwe na Komite Nyobozi,  Inama Njyanama,  abayobozi b'amashami na ba ES sectors basuzumye ibikorwa byagezweho muri 2020/2021 n'ibiteganijwe muri 2021/2022.
Mu bitekerezo byatanzwe hari uko urubyiruko rwarushaho kwitabwaho rugaherekezwa mu guhanga imirimo iruteza imbere. Abayobozi b'imurenge bifuje ko gahanahana amakuru n'abafatanyabikorwa byarushaho kunoga kugirango ubufatanye butange umusaruro nyawo.
Abafatanyabikorwa basabwe gukora baharanira guhindura imyumvire y'abaturage kuko hari bamwe mu bagenerwabikorwa bagitekereza ko bazahora bafashwa.

Guverineri w'Intara  y'iburengerazuba Bwana Habitegeko François yatanze  ikiganiro yise "Improving performance and service delivery in Ngororero District".
Iki kiganiro  cyuzuye impanuro ku kunoza imikorere n'imikoranire hagati y'inzego z'ubuyobozi n'abafatanyabikorwa byose ku ineza y'abaturage. Yashimangiye ko ukora adatekereza kuvana umuturage mu bukene aba yaribeshye umurongo. Ikiganiro cyateguranywe ubuhanga cyakoze ku mutima abari mu mwiherero bose.

Guverineri yibukije ko gukorera hamwe hahangwa udushya kugirango iterambere rirambye rirusheho gushinga imizi; gukora hazirikanywa umuturage, mu buzima bwe bwa buri munsi, guhuza imbaraga mu mikorere n'imikoranire ari bimwe mu byatuma Akarere ka Ngororero kesa imihigo neza.

Ku munsi wa 3 w'umwiherero w'abafatanyabikorwa mw'iterambere ry'Akarere ka Ngororero;  ibibazo bibangamiye imibereho y'abaturage byaganiriweho ku buryo bwimbitse. Bagendeye ku mpanuro bahawe na Governor,  bashingiye k'uko umuturage atafashwa adafite aho kuba heza; abari mu mwiherero bafashe umwanzuro ko ibibazo bibangamiye imibereho y'abaturage bigomba kubonerwa ibisubizo birambye.
Muri uyu mwiherero Umuyobozi  w'Akarere Bwana Ndayambaje Godefroid yashimiye Nyakubahwa Perezida wa Repubulika urangaje imbere ibikorwa by'iterambere himakazwa imiyoborere myiza yashyize umuturage kw'isonga.
Mayor Ndayambaje yashimiye abitabiriye umwiherero bose k'ubufatanye bwabaranze umwaka w'ingengo w'imali ushize n'utaha.
Abafatanyabikorwa bahawe icyemezo cy' ishimwe ku mikorere n'imikoranire yabaranze kandi ikomeje kubaranga.
Umwiherero washojwe ku mugaragaro n'umunyamabanga w'inama Njyanama y'Akarere Madame Dusabirema Marie Rose nawe washimiye abafatanyabikorwa k'uburyo baharanira iterambere ry'Akarere ka Ngororero.
Uyu mwiherero w'iminsi 3 waranzwe n'ikiganiro "Improving Performance  and  Service Delivery in Ngororero District " cyuzuye impanuro zigenewe abayobozi n'abafatanyabikorwa cyatanzwe na Governor w'Intara y'iburengerazuba Bwana Habitegeko François.