Kwibuka ku nshuro ya 31 Jenoside yakorewe Abatutsi mu 1994 byakomereje ku rwibutso rwa Jenoside rwa Kesho mu murenge wa Muhanda ahashyinguwe inzirakarengane 2517.

Uyu muhango wabanjirijwe no gushyira indabyo ku mugezi wa Giciye wajugunywemo inzirakarengane zazize Jenoside yakorewe Abatutsi.
Ni igikorwa cyayobowe na Guverineri w'Intara y'Iburengerazuba, Hon. Ntibitura Jean Bosco.
Abacitse ku icumu rya Jenoside yakorewe Abatutsi basabye ko hashyirwaho ikimenyetso (monument) kitazibagirana cyakwandikwaho amazina y'abajugunywe muri uyu mugezi.

Umuyobozi w'Akarere Bwana Nkusi Christophe yavuze ku mwihariko wa Jenoside yakorewe Abatutsi ku musozi wa Kesho: Abatutsi bari bahungiyeyo bagabweho igitero n'aba GP barindaga guverinoma y'Abatabazi yari yarahungiye mu ruganda rw'icyayi rwa Rubaya ahari umurambo wa Perezida HABYARIMANA Juvenal. Ikindi kidasanzwe ni uko abahungiye kuri uyu musozi baroshywemo inzuki bagahunga, bagatangirwa n'interahamwe n'imbwa zabahigaga mu mashyamba akikije uyu musozi.
Abitabiriye iki gikorwa bunamiye inzirakarengane zazize Jenoside yakorewe Abatutsi i Kesho bashyira indabyo ku rwibutso.

Imbaga yitabiriye iki gikorwa yakurikiranye ikiganiro kijyanye na Jenoside yakorewe Abatutsi cyatanzwe na Uwizeye Jean de Dieu wo muri Association Modeste et Innocent.
Yavuze ko mbere y'uko abakoloni babiba amacakubiri, Abanyarwanda  bari bunze ubumwe kandi bafite indangagaciro nyarwanda zishyira imbere ubumwe.
Yavuze ko ingengabitekerezo ya Jenoside yabibwe hakorershejwe ingufu zikomeye kandi ko bisaba imbaraga nyinshi zo kuyirwanya no kuyirandura burundu.
Kanyeshuli warokotse Jenoside yakorewe Abatutsi, yatanze ubuhamya agira ati: "Abana bavutse nyuma ya Jenoside, bazmenye ko ibyo tuvuga ari ukuri kuko twabibayemo." Yavuze uburyo abayobozi ba leta ya mbere n'iya kabiri babibye amacakubiri mu Rwanda kugeza igihe byatumye habaho Jenoside yakorewe Abatutsi mu 1994.
Mu bana 21 bavukanye na we, 16 biciwe muri Jenoside yakorewe Abatutsi.

Perezida wa IBUKA mu Karere, Bwana NTAGISANIMANA Jean Claude, yashimiye abarokotse kuba bataraheranywe n'agahinda, agira ati: "Mugeze aheza mwiteza imbere, mukomere kandi mutwaze."
Yashimiye ubuyobozi bw'Akarere kuba bwaragize uruhare mu kwandika igitabo kivuga ku mateka ya Jenoside yakorewe Abatutsi mu 1994 mu Karere ka Ngororero.
Yibanze ku bibazo abarokotse bagifite:
Hariho abarokotse Jenoside 380 bakomeje kubaho nabi kuko bafite amazu ashaje;
Inkunga ihabwa abatishoboye ntabwo ihagije ukurikije ibiciro by'uyu munsi;
Abanduye indwara mu gihe cya Jenoside yakorewe Abatutsi mu 1994 bakora ingendo za kure bagiye kwivuza kandi ubushobozi ari buke; ikibazo cy'inzibutso za Jenoside zidateguye neza, ingengabitekerezo ya Jenoside itararanduka mu Karere ka Ngororero. Hariho kandi ikibazo cy"imibiri itaraboneka ngo ishyingurwe mu cyubahiro.
Guverineri w'Intara y'Iburengerazuba, Hon. Ntibitura Jean Bosco, yihanganishije abarokotse Jenoside yakorewe Abatutsi, ashimira ingabo zahagaritse Jenoside. Yamaganye cyane abakomeje kwamamaza ingengabitekerezo ya Jenoside, cyane cyane mu karere u Rwanda ruherereyemo, avuga ko Jenoside itazongera kubaho kandi ko tugomba kurwanya cyane abashaka gucamo ibice Abanyarwanda.
Yashimiye abarokotse Jenoside yakorewe Abatutsi ubutwari bagize mu kwiyubaka no kubaho neza. Yavuze ko batagomba guheranwa n'agahinda kuko byaba ari ugushyigikira abahekuye u Rwanda.

 #TwibukeTwiyubaka.

KWIBUKA KU NSHURO YA 31 JENOSIGE YAKOREWE ABATUTSI KU RWIBUTSO RWA KESHO MU MAFOTO