Kuri uyu wa 8/06/2022 mu murenge wa Kavumu habayeho igikorwa cyo kwibuka ku nshuro ya 28 Jenoside yakorewe Abatutsi mu cyahoze ari komini Ramba.

Igikorwa cyahuje imiryango y'ababuze ababo baturutse hirya no hino mu Rwanda bakiriwe n'umuyobozi w'Akarere Bwana Nkusi Christophe ari kumwe  Perezida wa Ibuka mu Karere, abayobozi b'inzego z'umutekano Perezida w'Inama Njyanama y'Akarere, bamwe mu bagize inama Njyanama,  n'abaturage b'imirenge igize icyahoze ari komini Ramba aryo Kavumu, Kageyo na Sovu.

Hari iyi tariki ya 8/06/1994 ubwo  mu murenge wa Kavumu  abicanyi bafashe abana 12 bakabataba mu cyobo ari bazima bagapfa urw'agashinyaguro bishwe n'inyota n'inzara. Mu rwibutso rwa Kavumu haruhukiye inzirakarengane 374.

Ikiganiro ku nsanganyamatsiko "Twahisemo kuba umwe" cyatanzwe n'umujyanama mu nama njyanama y'Akarere ka Ngoroero Bwana  Shyerezo Norbert. Yahamagariye buri wese by'umwihariko urubyiruko kwima amatwi abagifite umugambi mubisha wo guca ibice mu banyarwanda babiba ingengabitekerezo ya jenoside.
Umutangabuhamya Bizimungu yavuze ku nzira y'umusaraba we na bagenzi be banyuze ubwo bahigwaga n'abicanyi.
Yashimiye ingabo zabarokoye zigatuma batazima ubu bakaba bariyubatse we na bagenzi be kuko banze guheranwa n'agahinda.

Uhagarariye imiryango y'abarokotse Jenoside yakorewe Abatutsi Umujyanama  mu nama njyanama y'Akarere ka Ngororero Budengeri Eulade yagarutse ku mbwirwaruhame Mugesera Leon yavugiye ku Kabaya ihamagarira kwica abatutsi igakongeza ubwicanyi bwahitanye benshi.

Perezida wa Ibuka mu Karere yashimiye ubuyobozi bwiza bw'Igihugu cyacu bwakoze ibishoboka byose bakagarura ubumwe n'ubwiyunge mu banyarwanda bakaba barahisemo kuba umwe.

Umushyitsi mukuru muri iki gikorwa yari Hon. Depite Manirarora Annoncée.
Yagarutse ku butwari bwaranze basore n'inkumi bahaze ubuzima bwabo bagahagarika Jenoside asaba buri wese kurwanya abagifite ingengabitekerezo ya jenoside. Yongeye gusaba abazi aho imibiri y'abishwe iherereye kuherekana igashyingurwa mu cyubahiro.

Igikorwa cyo kwibuka Jenoside yakorerwe Abatutsi mu cyahoze ari Komini Ramba cyanaranzwe no kunamira inzirakarengane zishyinguye mu rwibutso rwa Kavumu hashyirwa indabyo aho baruhukiye.