Umuganda ngarukakwezi usoza ukw'Ukwakira wabereye mu mirenge yose. Ku rwego rw'Akarere wabereye mu murenge wa Gatumba aho ba Honorables Depite Nyabyenda Damien na Gihana Donatha bifatanije n'abaturage b'uyu murenge gutunganya ahangijwe n'ubucukuzi bw'amabuye y'agaciro bunyuranije n'amategeko basiba ibinogo banatera ibiti. 
Bari kumwe n'umuyobozi w'Akarere Bwana Nkusi Christophe, abayobozi b'Akarere bungirije bombi, inzego z'umutekano,  abayobozi n'abaturage b'umurenge wa Gatumba. 

 Nyuma y'umuganda abaturage baganirijwe kuri gahunda za Leta zitandukanye:
Visi Meya ushinzwe iterambere ry'ubukungu Bwana Uwihoreye Patrick yabaganirije ku kubungabunga ibidukikije, ku kamaro k'igiti, igihembwe cy'ihinga. Abaturage bihanangirijwe  guca ukubiri n'ubucukuzi bw'amabuye y'agaciro bunyuranije n'amategeko. 
Visi meya ushinzwe iterambere ry'imibereho myiza y'abaturage Madamu Mukunduhirwe Benjamine yibukije abaturage kwitwararika isuku ahantu hose, ku mubiri no ku myambaro.
Yagize ati intero "isuku hose ihera kuri njye, nkunda isuku sindebera umwanda" tuyigire iyacu.
Yasabye abaturage kubahiriza gahunda yo kwivana mu bukene kuko amahirwe bahawe n'ubuyobozi bwiza bw'Igihugu cyacu bagomba kuyabyaza umusaruro. 
Umuyobozi wa Police station ya Gatumba yibukije abaturage gukomeza gusigasira umutekano barinda ibyagezweho by'umwihariko ibikorwa remezo.
Hon. Depite Nyabyenda yagarutse ku buhinzi asaba abahinzi n'aborozi kwitabira ubwishingizi bw'imyaka n'amatungo, kurwanya imirire mibi n'igwingira,  kubungabunga ibidukikije no gusigasira ibikorwa remezo. Yanashimiye abaturage uburyo bitabiriye amatora kandi bagatora neza. Yabasabye kwivana mu bukene bubahiriza gahunda ya Gira Wigire ntibapfushe ubusa amahirwe bahawe n'ubuyobozi bwiza bw'igihugu cyacu abafasha kwiteza imbere. 

Abaturage bahawe umwanya wo kubaza, gutanga ibitekerezo  no gushima. Ibibazo byabajijwe byose byashubijwe.

Umuyobozi w'Akarere yashoje ashimira intumwa za rubanda uburyo zikomeje kwegera abaturage bakamenya uko babayeho, ibibazo bafite no kubafasha kubishakira ibisubizo. Yongeye gusaba abaturage kubahiriza gahunda za Leta zigamije kubateza imbere kandi bakarinda ibyagezweho.