Uyu munsi gahunda yo kwibuka ku nshuro ya 29 Jenoside yakorewe Abatutsi mu 1994 yakomereje ku rwibutso rwa Ngororero mu murenge wa Ngororero.
Uwizeye Jean de Dieu wo muri Association Modeste et Innocent (AMI) yavuze ko kuba abantu bafite intimba ku mutima biyongera ari uko  hakiri abantu bagifite imitima inangiye badashaka kwerekana aho imibiri y'abishwe iherereye ngo ishyingurwe mu cyubahiro.

Ubuhamya bwa Mukasano Gaudence warokotse Jenoside yakorerwe Abatutsi bwashenguye benshi. Yagarutse ku nzira y'umusaraba yanyuze we na bagenzi be ubwo bahigwaga n'abicanyi. Yabonye urwagashinyaguro bishe inzirakarengane zari kumwe nawe. Yabonye imbaga y'abatutsi batemagurwa. Yabonye n'abahambwe ari bazima.
Yavuze ku buzima bugoye babayemo mu cyahoze ari ingoro ya MRND  bicwa n'inyota n'inzara. Yashimiye Inkotanyi zarokoye Abatutsi bahigwaga zikanahagarika Jenoside. Ubu yarangije masters ari kwiga PHD. Yahamagariye buri wese kurwanya yivuye inyuma ingengabitekerezo ya Jenoside no kwamaganira kure abahakana n'abapfobya Jenoside yakorewe Abatutsi mu 1994.

Perezida wa Ibuka Ntagisanimana Jean Claude yagarutse ku bibazo bikibangamiye imibereho myiza y'abarokotse birimo amacumbi ashaje hamwe na hamwe, imanza za gacaca zitararangizwa kimwe n'abasahuwe imitungo bakaba batarayisubizwa. Yasabye ko amateka ya Jenoside yakorewe Abatutsi mu Karere la Ngororero yakwandikwa bidatinze.
Umuyobozi w'Akarere Bwana Nkusi Christophe yavuze ko ubuyobozi bw'Akarere bwitaye ku gushakira ibisubizo birambye ibi bibazo byose.
Yashimiye abarokotse banze guheranwa n'agahinda ubu bakaba barateye intambwe ikomeye mu kwiyubaka.

Honorable Manirarora Annoncée yagarutse ku mibiri itaraboneka agira ati ese "izajya iboneka ari uko hari gukorwa umuhanda, mvura yatenguye ubutaka, cyangwa igihe cy'hinga". Yasabye abakinangiye imitima kwisubiraho kuko kutaranga aho imibiri iherereye ari imbogamizi ku bumwe n'ubwiyunge kuko bituma abababuze  bahorana intimba ku mutima.
Yashimiye ingabo  zahagaritse Jenoside avuga ko itazongera ukundi kubera Nyakubahwa Perezida wa Repubulika uri kw'isonga ry'imiyoborere myiza.
Yasabye ko urwibutso rwa Ngororero rwakubakwa neza bityo amateka yarwo akarushaho gusigasirwa.

Igikorwa cyashojwe no kunamira inzirakarengane ziruhukiye mu rwibutso rwa Jenoside rwa Ngororero, hanashyingurwa mu cyubahiro imibiri yabonetse.
Uyu munsi wubahirijwe n'Abadepite mu Nteko Ishinga Amategeko, Perezida w'Inama Njyanama y'Akarere n'abandi bajyanama, Komite Nyobozi y'Akarere, Perezida wa Ibuka, umuyobozi wa AVEGA, abayobozi b'inzego z'umutekano zikorera mu Karere, umuyobozi wa RIC n'abandi bayobozi b'amadini n'amatorero, Perezida wa JADF abanyamabanga nshingwabikorwa b'imirenge n'imbaga y'abaturage baturutse imihanda yose by'umwiharuko abafite ababo baruhukiye mu rwibutso rwa Ngororero.