Uyu munsi mu Karere ka Ngororero gahunda yo kwibuka ku nshuro ya 29 Jenoside yakorewe Abatutsi mu w’1994 mu Rwanda yatangiriye  ku rwibutso rwa Jenoside yakorewe Abatutsi rwa Kabaya ruherereye mu murenge wa Kabaya.
Yatangijwe no kunamira inzirakarengane 205 ziharuhukiye hashyirwa indabyo kuri uru rwibutso.

Mu gutanga ikiganiro ku mateka ya Jenoside yakorewe abatutsi mu 1994 Bwana Michel yagarutse ku ijambo rutwitsi Leon Mugesera yavugiye mu ruhame ku Kabaya ubwo yavugaga ko abatutsi bagomba kwicwa bakarohwa muri Nyabarongo ngo bagasubira iwabo muri Etiyopiya. Iri jambo ryakongeje ubwicanyi bukwira hose mu murenge wa Kabaya no hanze yawo, abatutsi bicwa urwagashinyaguro.

Umutangabuhamya Mukungu Alivera yavuze ku nzira y'umusaraba yanyuze we na  bagenzi be ubwo bahigwaga n'abicanyi ashimira ingabo zarokoye imbaga y'abatutsi bari bugarijwe n'inkoramaraso kandi zikanahagarika Jenoside.
Yashimiye ubuyobozi bwiza bw'Igihugu cyacu burangajwe imbere na Nyakubahwa Perezida wa Repubulika Paul KAGAME bwita ku barokotse bubashakira imibereho myiza ubu bakaba bariyubatse bubaka n'Urwababyaye.
Perezida wa IBUKA Bwana Ntagisanimana Jean Claude nawe yashimiye ubuyobozi bwiza bw'Igihugu cyacu budahwema kuzirikana abarokotse Jenoside, anabashimira ko banze guheranwa n'agahinda bakaba bageze kure biyubaka. Yashimiye ubuyobozi bw'Akarere uburyo bukemura ibibazo bibangamiye imibereho myiza y'abacitse ku icumu rya Jenoside. Yagaragaje ibibazo bitarabonerwa ibisubizo nk'imanza z'inkiko gacaca zitararangizwa kimwe n'imitungo itarishyurwa abayisahuwe. Yasabye ko "kwandika amateka ya Jenoside yakorewe Abatutsi muri aka Karere byakwihutishwa."
Umuyobozi w'Akarere Bwana Nkusi Christophe yavuze ko ibibazo ubuyobozi bw'Akarere bubizi kandi ko biri mu nshingano zabwo kubibonera umuti. Yijeje ko n'ibitarakemuka biri mu nzira zo kurangira.

Hon. Depite Nyabyenda Damien yagarutse ku bibazo abarokotse Jenoside bagihura nabyo nko kuba hari abatazi aho ababo bishwe bahereye. Yongeye kwibutsa ko uwaba uzi aho izo nzirakarengane ziherereye yaherekana bityo bene bo bakaruhuka intimba ibahora ku mutima.  Hon. Nyabyenda ashoje ijambo rye yibutsa abaturage kugendera kure ingengabitekerezo ya Jenoside no kwamaganira kure abayihembera n'abapfobya Jenoside yakorewe Abatutsi mu w’1994 mu Rwanda.
Gahunda y'uyu munsi yashojwe no gukurikira kuri Radio Rwanda ijambo rya Nyakubahwa Perezida wa Repubulika y'u Rwanda yageneye abanyarwanda  kuri uyu munsi wo kwibuka ku nshuro ya 29 Jenoside yakorewe Abatutsi mu w'1994.
Iyi gahunda yitabiriwe na Hon. Depite Nyabyenda Damien,  Komite Nyobozi y'Akarere ka Ngororero, vice president w'Inama Njyanama y'Akarere na bamwe mu bajyanama, uhagarariye AVEGA, Perezida wa IBUKA, Perezida wa JADF abayobozi b'inzego z'umutekano zikorera mu Karere, imiryango y'ababuze ababo baruhukiye ku rwibutso rwa Kabaya n'abaturage b'umurenge wa Kabaya