Gahunda yo kwibuka ku nshuro ya 29 Jenoside yakorewe Abatutsi mu 1994 yakomereje ku rwibutso rwa Cyome n'urwa KIBIRIRA ziherereye murenge wa Gatumba.
Yatangiriye ku rwibutso rwa Cyome hunamirwa inzirakarengane bagera kuri 400 baroshywe mu mu mugezi wa Nyabarongo, ikomereza ku bitaro bya Muhororo hibukwa abaganga, abakozi n'abarwaza bahiciwe, isoreza ku rwibutso rwa KIBIRIRA hunamirwa inzirakarengane ziruhukiye muri uru rwibutso hanashyingurwa Imibiri yabonetse.

Mu guha ikaze abashyitsi umuyobozi w'Akarere bwana Nkusi Christophe yagarutse ku nsanganyamatsiko igira iti: "Twibuke twiyubaka ashimira abarokotse "uburyo banze guheranwa n'agahinda ubu bakaba bageze kure biyubaka ari nako biyubakira Urwababyaye." 
Yavuze ko ibibazo abarokotse Jenoside yakorewe Abatutsi bagihura nabyo byitaweho kugirango bibonerwe ibisubizo bidatinze. Muri byo harimo amacumbi amwe n'amwe  agomba gusanwa, imanza za gacaca zitararangizwa, imitungo yasahuwe itarishyurwa bene yo.
Yibukije abaturage kugendera kure ingengabitekerezo ya Jenoside no kwamaganira kure abahakana n'abapfobya Jenoside yakorewe Abatutsi.
Yagize ati "amateka ashaririye twanyuzemo ntagasubire ukundi".

 Mu cyahoze ari komini Kibirira hageragerejwe Jenoside ubwo Abatutsi batangiye kwicwa mu 1990; mu karere ka Ngororero harabarurwa inzirakarengane 57,000 bazize uko baremwe.
Uwizeye Jean de Dieu wo muri Association Modeste et Innocent (AMI) yatanze ikiganiro ku mateka ya Jenoside, uburyo amacakubiri yabibwe mu banyarwanda agahabwa intebe kugeza ubwo ahitanye Abatutsi batabarika muri Jenoside yakorewe Abatutsi mu 1994.

Uwatanze ubuhamya Sebatware Felix yagarutse ku nzira y'umusaraba yanyuze we n'ababyeyi be, hamwe n'Abatutsi bahigwaga n'abicanyi. Yashimiye umudamu witwa Patricia watumye arokoka kimwe n'Inkotanyi zahagaritse Jenoside. Yashimiye ubuyobozi bwiza bw'Igihugu cyacu burangajwe imbere na Nyakubahwa Perezida wa Repubulika Paul KAGAME bwita ku barokotse bubashakira imibereho myiza.
Perezida wa Ibuka Ntagisanimana Jean Claude yavuze ko hakigaragara ingengabitekerezo ya Jenoside mu murenge wa Gatumba, ihungabana, ubukene mu barokotse, ubushomeri mu rubyiruko, imibiri itaraboneka ngo ishyingurwe mu cyubahiro; asaba ko  hatekerezwa ku buryo bwihuse ibi byose bikabonerwa umuti urambye.

Guverineri w'Intara y'Iburengerazuba Bwana Habitegeko Francois wari umushyitsi mukuru yihanganishije abarokotse Jenoside yakorewe Abatutsi, abashimira uburyo bataheranywe n'agahinda bakaba bageze aheza biyubaka.
Yashimiye ubutwari bw'abarokoye abari bugarijwe n'urupfu agaya ibigwari byateguye Jenoside bikanayishyira mu bikorwa.
Guverineri Habitegeko yibukije ko abanyarwanda ari abavandimwe ko "abaduciyemo ibice bakurikije  amoko  boretse u Rwanda mu icuraburindi"
Yashimiye ubuyobozi bwiza bw'Igihugu cyacu burangajwe imbere na Nyakubahwa Perezida wa Repubulika Paul KAGAME bwashyize umuturage kw'isonga buri munyarwanda akaba atekanye aharanira iterambere.
Yasabye buri wese kwamagana abagifite umutima unangiye bakava ibuzimu bakajya ibuntu. Yasabye urubyiruko by'umwihariko kurushaho gukaza umurego hifashishijwe imbuga nkoranyambaga mu kunyomoza abahakana bakanapfobya Jenoside yakorewe Abatutsi.

Umunsi wubahirijwe na Guverineri w'Intara y'iburengerazuba Bwana Habitegeko Francis, abadepite mu Nteko Ishinga Amategeko, abajyanama mu Inama Njyanama y'Akarere, Abagize Komite Nyobozi y'Akarere, abayobozi b'inzego z'umutekano zikorera mu Karere, Perezida wa Ibuka n'umuyobozi wa AVEGAmu Karere, Perzia wa RIC n'uwa JADF, abayobozi b'amadini n'amatorero, abihayimana, imiryango y'ababuze ababo baturutse imihanda yose n'imbaga y'abaturage baturutse hirya no hino mu Karere ka Ngororero.