Umurenge wa Bwira uri hafi kubona ibikorwa remezo bizatuma abaturage baruhuka imvune bagiraga mu guhahirana n'indi mirenge. Muri byo hari umuhanda uzawuhuza n'imirenge ya Gatumba, Ndaro na Nyange; n'isoko rya Gashubi ribarirwa mu masoko manini y'Akarere ka Ngororero ririmo kubakwa ku bufatanye bw'Akarere n'Ikigo cy'Igihugu gishinzwe Itermabere (RDB). Ririmo kubakwa na kompanyi ya IBC Ltd rikazatwara agera kuri miliyoni ijana n'eshatu (103,000,000 frws).

Kuri uyu wa 5/09/2023 Umuyobozi w'Akarere Bwana Nkusi Christophe ari kumwe n'Umuyobozi w'Akarere wungirije ushinzwe iterambere ry'ubukungu Bwana Uwihoreye Patrick n'Umunyabanga nshingwabikorwa w'Akarere Bwana Bahizi Emmanuel n'uw'Umurenge wa Bwira Bwana Japhet Musabyimana basuye iy'ubakwa ry'isoko rya Gashubi. Basanze imirimo iri kugenda neza baganira n'abaturage bari baremye isoko babagarariza ibyishimo baterwa no kuba  bagiye kubona isoko rya kijyambere rizatuma bakorera ahantu hatunganye, hasukuye hatari umukungugu, umuyaga n'imvura. Bavuze ko bashimira ubuyobozi bwiza bw'Igihugu cyacu budahwema kuzirikana iterambere ry'imibereho myiza y'abaturage.
Isoko rya Gashubi ni rimwe mu masoko manini mu Karere ka Ngororero riremwa n'abaturage baturutse mu mirenge hafi ya yose y'Akarere ka Ngororero ndetse n'abo mu mirenge y'Akarere ka Rutsiro ihana imbibi n'Akarere ka Ngororero.
Iri soko ririmo kubakwa mu gihe kimwe n'umuhanda Gatumba-Bwira- Nyange. Abaturage bavuga ko bagiye kuva mu bwigunge, bagahahirana n'indi mirenge biboroheye, bakabona akazi gatuma biteza imbere, bakanagera ku bitaro bya Muhororo bitabagoye.

Mu gusura iri soko hari abatekinisiye b'Akarere Ntirikina Jean Bosco ushinzwe ibikorwaremezo na Munyarukiko Aloys ushinzwe ibidukikije bagenzuraga ibikorwa bya muntu birimo amasuri bibangamiye ibidukikije banashaka uburyo byabonerwa ibisubizo.