Guverineri w'Intara y'Uburengerazuba Dr Dushimimana Lambert yatangije igihembwe cy'ihinga 2024A. Ku rwego rw'Intara y'Uburengerazuba igikorwa cyabereye mu Karere ka NGORORERO mu murenge wa Nyange ku butaka buhuje ku buso bungana na hegitari 30 mu gishanga cya Songa ahagiye  guhingwa ibigori.

Nyuma yo gutera imbuto y'ibigori hakurikiyeho inteko y'abaturage: bakanguriwe gufata ubutaka neza, gukurikirana imyaka mu mirima bayirinda ibyonnyi, gufata neza amatungo magufi n'amanini.
Bibukijwe ko umutekano ariwo musingi w'ibikorwa byose basabwa kwirinda icyawuhungabanya icyo ari cyo cyose.
Mayor Nkusi: "tubashimira uburyo musigasira umutekano mwitabira umurimo; bitanga icyizere ko mwumvise gahunda yo kwigira ari nako murandura imirire mibi n'igwingira." Yashimiye Guverineri waje kwifatanya n'abaturage b'umurenge wa Nyange mu guharanira ko Akarere kose kagira ibiryo.

Guverineri Dushimimana yasabye: abatekinisiye b'ubuhinzi  guhora hafi y'abaturage bakirinda kuba mu biro. Abahinzi yabasabye gushyira imbaraga mu gufata ubutaka neza no gukurikirana ibihingwa kugirango bitange umusaruro mwiza. Yanabakanguriye kugira ubwishingizi bw'ibihingwa ndetse n'amatungo kugirango biteganyirize igihe batungurwa n'ibihe bibi. Yabasabye gukomeza kwihaza mu biribwa bityo bagasezerera imirire mibi n'igwingira.
Nyuma y'Inama hari abaturage basenyewe n'ibiza n'abatishoboye bahawe amabati.
Igikorwa cyitabiriwe na Komite Nyobozi y'Akarere, abayobozi b'inzego z'umutekano zikorera mu Karere, abakozi ba RAB, abo mu ishami ry'ubuhinzi n'ubworozi, ab'umurenge wa  Nyange n'abahinzi benshi bavuga ko biteze umusaruro mwiza kubera ko bahingiye ku gihe.