Uyu munsi Minisitiri w'Umutekano mu Gihugu akaba n'Imboni y'Akarere ka Ngororero muri Guverinoma Hon. Visenti BIRUTA yagiriye uruzinduko rw'akazi mu Karere ka Ngororero aho yaje kwifatanya n'abatuye aka Karere kwizihiza Umunsi wahariwe ingo mbonezamikurire. Ku rwego rw'Akarere wizihirijwe mu murenge wa Nyange ku nsanganyamatsiko igira iti: "Mubyeyi jyana umwana wawe mu rugo mbonezamikurire  rukwegereye, umugaburire indyo yuzuye hatabuzemo ibikomoka ku matungo. "Umwana wanjye ishema ryanjye.""
Yakiriwe na Guverineri @RwandaWest Bwana Ntibitura Jean Bosco ari kumwe n'intumwa y'Ikigo cy'Igihugu gishinzwe imikurire no kurengera umwana, Umuyobozi w'Inama Njyanama y'Akarere, abagize Komite Nyobozi y'Akarere, abayobozi b'inzego z'umutekano n'abafatanyabikorwa nka World Vision, Caritas Nyundo na Imbuto foundation.
Akarere Ngororero kamaze gutera intambwe igaragara mu kurwanya imirire mibi n'igwingira: Ubushakashatsi bwakozwe mu cyumweru cyahariwe umubyeyi n'umwana muri Mutarama 2025 bugaragaza ko kavuye kuri 50,5% by'abana bagwingiye ubu kakaba kageze kuri 21,7%. Urugendo rurakomeje.
Kwizihiza uyu munsi byabimburiwe no kugaburira abana indyo yuzuye mu irerero rya JYEJURU mu mudugudu wa Cyambogo.
Akarere ka Ngororero gafite ingo mbonezamikurire 1,330 zirimo abana 31,973. Muri zo 165 zikorera mu ngo,125 zikorera mu mashuli.
Mu ijambo yagejeje ku mbaga y'abitabiriye ibi birori Minisitiri Biruta yibukije ko umwana agomba kwitabwaho agukura mu gihagararo no mu bwenge kuko niwe Rwanda rw'ejo. Yibukije kandi ko ababyeyi batwite bagomba kwitabwaho hakiri kare bagahavwa ibyangombwa byose bituma bazibaruka abana batagwingiye.
Yibukije ko isuku igomba kugirwa nyambere  n'ibijyanye nayo byose nko kugira ubwiherero bwujuje ibyangombwa. Yabasabye guhora bitabira gahunda za Leta zigamije uburere bw'umwana uzira imirire mibi n'igwingira. Yashimiye  ababyeyi bakora mu ngo mbonezamikurire ubwitange bakorana, abizeza ko Leta itazahwema kubashyigikira muri iki gikorwa cy'ingirakamaro. Bahawe seritifika z'ishimwe. Yashimiye kandi abafatanyabikorwa baharanira kurwanya imirire mibi n'igwingira "bituma twubaka u Rwanda twifuza."
Ibirori byaranzwe kandi n'ikinamico z'Urunana zatanze inyigisho zerekeza ku muryango ushoboye kandi utekanye wuje indangagaciro nyarwanda uzira amakimbirane yo ntandaro y'isuku nke,  imirire mibi n'igwingira, n'indwara ziterwa n'umwanda.