Kuri uyu wa gatandatu tariki 2/05/2026 mu Karere ka Ngororero habereye inama igamije gushimangira ikurikiranwa n’ingamba zo kurwanya indwara ya kolera. Iyi nama yayobowe n’Umuyobozi w’Akarere ka Ngororero, Bwana NKUSI Christophe, hifashishijwe urubuga rwa Webex, yitabirwa n’Abayobozi bungirije b’Akarere,
Abayobozi Bakuru b’Ibitaro bya Muhororo na Kabaya,
abahagarariye inzego z’umutekano ku rwego rw’Akarere, abayobozi b’ibigo nderabuzima, Abanyamabanga Nshingwabikorwa b’Imirenge, abashinzwe ubuzima n’isuku ku rwego rw’Imirenge n'abayobozi b’amashuri yo mu Karere ka Ngororero.
Intego y’iyi nama yari ugusesengura uko icyorezo cya kolera gihagaze mu Ntara y’Iburengerazuba n’ingaruka zishobora kugera ku Karere ka Ngororero. Yari inagamije gushimangira uburyo bwo gukurikirana, gukumira no gutabara mu gihe indwara yagaragaye.
Habayeho isesengura ry’uko ibintu bihagaze ubu mu Ntara y'Iburengerazuba muri rusange no mu Karere ka Ngororero by',umwihariko. 
Ingamba zafashwe:
- kongera imbaraga mu kuyikurikirana cyane cyane ahari ibyago byinshi byo kuba yahagera
- guhamya no gushimangira ingamba zo kuyirinda hibandwa ku isuku, isukura n’ubukangurambaga rusange mu baturage.
Abitabiriye inama bemeranyije ku ngamba zikurikira:
- Kongera ubukangurambaga ku gukaraba intoki, gukoresha amazi meza no kubungabunga isuku y’ibiribwa
- Gukoresha neza ubukarabiro no gutuma ibikoresho byo gukaraba intoki biboneka ahantu hahurira abantu benshi kandi bikora neza;
- Kwihutisha iyubakwa ry'ubwiherero  aho ari ngombwa n’imikoreshereze ikwiye yabwo;
- Kurandura kwituma ahatabugenewe no gukoresha imyanda y’abantu nk’ifumbire;
-Gushimangira isuku mu mashuri, no gukoresha neza ibikoresho byo gukaraba intoki;
- Gukurikirana no kunoza uburyo bwo gutanga amakuru ku bakekwaho kolera ku rwego rw’umuryango no mu bigo nderabuzima;
- Ibitaro bya Kabaya na Muhororo ndetse n’ibigo nderabuzima bikorana nabyo bigomba gutegura amahugurwa y’abakozi b’ubuzima n’abajyanama b’ubuzima guhera ku wa mbere, tariki ya 04 Gicurasi 2026;
- Gushyiraho no gutangiza ibikorwa bya za Komite z’ihutirwa ku rwego rw’Akarere n’Imirenge guhera ku wa mbere, tariki ya 04 Gicurasi 2026;
- Gukaza ubugenzuzi ku isuku n’isukura cyane cyane ahacururizwa ibiribwa n’ahandi hahurira abantu bensgi;
- Ibitaro n’ibigo nderabuzima bigomba kwihutira gusaba ibikoresho n’imiti byose bikenewe mu gusuzuma, gupima no kuvura kolera;
- Guteganya ibyumba byihariye byo kwakira abarwayi ba kolera (isolation rooms);
- WASAC igomba gukomeza gutanga amazi meza ku buryo buhoraho.