Uyu munsi mu midugudu 419 igize Akarere ka Ngororero abaturage bizihije umunsi w'umuganura ku nsanganyamatsiko igira iti: ". Ku rwego rw'Akarere ibirori  byabereye mu mudugudu wa Rwankenke, akagari ka Gitega mu murenge wa Matyazo.
Umuyobozi w'Akarere ka Ngororero bwana Nkusi Christophe ari kumwe n'abayobozi b'inzego z'umutekano, umukozi w'Akarere ushinzwe Itorero n'abakozi b'umurenge bifatanije n'abaturage b'uyu mudugudu. Ibirori byabimburiwe n'imurika ry'umusaruro w'abaturage wiganjemo ibihingwa ngandurarugo.

Umuyobozi w'Akarere yagarutse ku mateka y'umuganura mu Rwanda warangwaga no gusangira akabisi n'agahiye. Yasabye abaturage gukomeza gusigasira uwo muco abagize umusaruro mwiza bagasangira n'abadafite ibihagije.
Yibukije ko uyu ari umwanya wo gusubiza amaso inyuma buri wese akareba ibyo yagezeho agafata ingamba zo gukora kurushaho akihaza mu biribwa agasagurira n'isoko.

Umuyobozi w'karere yongeye gusaba akomeje abaturage kwita ku buzima bw'abana babagaburira indyo yuzuye barwanya igwingira. Muri uru rwego  Akarere ka Ngororero kabonye umufatanyabikorwa mushya Hinga Wunguke uzafasha mu kongera umusaruro no kuwuha agaciro.
Yatinze ku mihigo y'Akarere yibutsa abaturage uruhare rwabo mu kuyishyira mu bikorwa nk'abagenerwabikorwa.
Uyu munsi waranzwe no kuganura kw'abana bagaburirwa indyo yuzuye, abakuru nabo bagize ubusabane baganura ibyo biyejereje.