Muri iki gitondo cyo kuwa 10/09/2023 mu cyumba cy'Inama cy'Akarere ka Ngororero hateraniye Inama yahuje abagize itsinda ryo guhangana n'ibiza igihe byaramuka bibaye mu Karere ( District Disaster Management Command Post) iyobowe n'Umuyobozi w'Akarere Bwana NKUSI Christophe ari kumwe n'Abayobozi b'Akarere bungirije bombi, Umunyamabanga Nshingwabikorwa w'Akarere, Umuyobozi w'Imirimo Rusange mu Karere, Umuyobozi w'Ibitaro by'Akarere bya Kabaya Dr NTIRENGANYA Emmanuel, Umuyobozi w'inkeragutabara Lt Col Edouard NKURANYABAHIZI, Umuyobozi w'Ingabo Maj Joseph RUHOGO, Abayobozi b'Amashami  n'Umuhuzabikorwa wa DASSO Wungirije.

Muri iyi haganiriwe ku ngamba zo gukumira ibiza no guhangana n'ingaruka zaramuka zikuruwe n'ibiza.

Hafashwe imyanzuro ikurikira:

- Kongera gukoresha Command Post ku nzego zose buri kagari  kagahabwa inshingano (Coordination, Response, Planning and Logistics, Secretariat and reporting).

- Guhuza ibyegeranyo byerekeranye n'ibiza byabaye mu kwezi kwa 05/2023 bigahuzwa n'iby'ibiza byaterwa n'imvura y'Umuhindo /2023.

- Gusura imiryango yakuwe mu manegeka igakodesherezwa hakarebwa ko inzu bakodesherejwe zikimeze neza ku buryo zitabashyira mu kaga.

- Kureba imiryango yaba igituye mu manegeka igakurwamo mu buryo bwihuse.

- Gukomeza gusura imiryango yapfushije abantu bitewe n'ibiza byabaye mu kwezi kwa 05/2023 hakarebwa uko babayeho n'uko inzu bacumbitsemo zimeze.

- Gusura Sites za ESECOR yo mu murenge wa Kavumu, KABAYA yo mu murenge wa Kabaya na  KARAMBO yo mu Murenge wa Gatumba zigatunganywa ku buryo zakwakira abantu igihe cyose byaba ngombwa.

 Gusuzuma niba hari ibikoresho mu bubiko (Strategic Store) bihagije ku buryo yafasha abantu bashobora kugirwaho ingaruka n'ibiza (Food and non food Items).

Imyanzuro yose yafashwe igomba gushyirwa mu bikorwa bitarenze Kuwa Gatatu tariki 13/09/2023.

Nyuma yo kungurana ibitekerezo abagize District Disaster Management Command Post bigabanyijemo amatsinda basura imirenge itandukanye mu rwego rwo gutegura ahantu hakwakira abantu (Evacuation Sites) hazacumbikirwaho imiryango ishobora guhura n'ibiza, banasuye imiryango yapfushije abantu bitewe n'ibiza byabaye mu kwezi kwa gatanu 2023 banareba ibikorwaremezo byagijwe n'ibiza.

 Itsinda riyobowe n'Umuyobozi w'Akarere Bwana NKUSI Christophe ari kumwe n'Umuyobozi w'Inkeragutabara mu Karere Lt Col Edouard NKURANYABAHIZI n'Umuyobozi w'Ishami ry'Iterambere ry'Imibereho Myiza basuye Umurenge wa Kageyo basura evacuation Site ya ESECOR hanasurwa imiryango yapfushije abantu bitewe n'ibiza banasura ikiraro cya Satinsyi cyangijwe n'ibiza ku buryo gikeneye gusanwa byihuse.

 Itsinda riyobowe n'Umuyobozi w'Akarere Wungirije Ushinzwe Iterambere ry'Ubukungu Bwana UWIHOREYE Patrick ari kumwe n'Umuyobozi Mukuru w'Ibitaro by'Akarere bya Kabaya Dr NTIRENGANYA Emmanuel, OC Stn Kabaya CIP IYAKAREMYE NSABIMANA, IO DASSO basuye Evacuation Site ya Kabaya banasura Site y'Ubuhinzi ya Mbandari harebwa aho abaturage bageze mu kwitegura igihembwe cy'ihinga 2024A aho bagaragaza imbogamizi z'uko Umurenge udafite Agronome wabafasha kwihutisha kubona inyongeramusaruro.

 Itsinda riyobowe n'Umuyobozi w'Akarere Wungirije Ushinzwe Iterambere ry'Imibereho Myiza y'Abaturage Madamu MUKUNDUHIRWE Benjamine ari kumwe n'Umunyamabanga Nshingwabikorwa w'Akarere Bwana BAHIZI Emmanuel, Umuyobozi wa One Stop Center basuye Umurenge wa Gatumba basura Evacuation Site ya Karambo.

Itsinda riyobowe n'Umuyobozi w'Imirimo Rusange mu Karere Bwana NDAYIKENGURUKIYE Jean Luc ryakoze igikorwa cyo kubara ibyasigaye muri Stock yo gufasha abagizweho ingaruka n'ibiza kugirango harebwe uko hashakwa ibidahari mu rwego rwo kwitegura gufasha abagirwaho ingaruka n'ibiza.

Evacuation Sites zasuwe harebwe iby'ibanze bihari hanabarwa ibibura kugirango zitunganywe zijye zifashishwa mu gucumbikira imiryango yaramuka ihuye n'ibiza.