Gutangiza icyumweru cyahariwe umujyanama byabereye mu murenge wa Sovu mu kagari ka Kagano aho abajyanama bifatanyije n'abaturage mu gikorwa cyo gutera imbuto y'ibirayi n'ibiti by'imbuto.

Umuyobozi w'Inama Njyanama y'Akarere Madamu Nyiramasengesho Jeannette yabwiye abaturage ati: "Muhinge kijyambere, mugire umusaruro mwiza, mwihaze mu biribwa, murinde abana igwingira, musagurire amasoko mwiteze imbere. "
Mu kiganiro n'abaturage yabasobanuriye imikorere y'Inama Njyanama n'impamvu y'icyumweru cyahariwe umujyanama.
Yagize ati: "Icyumweru cyahariwe Umujyanama ni ngarukamwaka mu Karere ka Ngororero. 
Uyu mwaka iki cyumweru giteganijwe kuri 17-20/03/2025 ku nsanganyamatsiko ikubiyemo gahunda yo kuvugurura urutoki,  gahunda ya "Tumurinde gusiragira ", kwimakaza isuku no kurwanya igwingira.

Ati  "ni umwanya abajyanama mu Nama Njyanama y'Akarere tubasanga iwanyu mu mirenge tugasasa inzobe tubatega amatwi, twungurana ibitekerezo ku byifuzo n'ibibazo mufite. Turabashikariza gukomeza kugira uruhare mw'iterambere ry'imiryango yanyu muhinga, mworora kijyambere,  mwirinda amakimbirane mu ngo, murwanya imirire mibi n'igwingira ry'abana bato, mukumira ihohoterwa rishingiye ku gitsina n'umutungo, mwitabira gahunda za Leta."
Abaturage kandi bahawe ibiganiro kuri gahunda ya "Tumurinde gusiragira ", kwimakaza isuku ni kurwanya igwingira,  kuvugurura urutoki n'ubundi buhinzi bwa kijyambere, k'umutekano n'izindi gahunda za Leta.
Iki gikorwa cyo gutangiza icyumweru cyahariwe Umujyanama cyitabiriwe n'umufatanyabikorwa SAIP umushinga ugamije ubuhinzi burambye no kwihaza mu biribwa  (Sustainable Agricultural,  Intensification and Food Security Project)  watanze imbuto y'ibirayi n'ifumbire.
Umunsi waranzwe no kugaburira abana indyo yuzuye. 
Abaturage bahawe umwanya wo gutanga ibitekerezo, ibyifuzo n'ibibazo byakiriwe na komisiyo zitandukanye zigize Inama Njyanama bihabwa umurongo.

GUTANGIZA ICYUMWERU CYAHARIWE UMUJYANAMA MU MAFOTO