Saa kumi nimwe bari bageze mu mihanda hirya no hino mu mirenge intero ari imwe, inyikirizo ari imwe: "Siporo ni ubuzima. Abagore twagiye."  Kuri uyu wa 2/06 siporo yari imaze icyumweru cyose itegurwa ku rwego rw'Igihugu muri rusange no mu Karere ka Ngororero by'umwihariko yahuje abagore bari babukereye baherekejwe na basaza babo n'inzego z'umutekano.

Ku rwego rw'Akarere bahuriye kuri Blue House ahazwi nko ku Rukiko barekeza kuri centre ya Kazabe baruhukira mu kigo abagenzi bategeramo imodoka cya Ngororero aho bakoreye imyitozo ngororamubiri itandukanye nyuma bahabwa ubutumwa bunyuranye.

Umukozi wa Minisiteri y'ubuzima yasobanuye birambuye uburyo siporo ari ingirakamaro mu buzima bwa buri munsi ngo kuko ituma "twirinda indwara zitandura zirimo diyabeti na hypertension ndetse n'umubyibuho ukabije"

Umuyobozi w'Inama y'Igihugu y'Abagore Madame Mukeshimana Marie Claire yahamagariye bagenzi be kwinjiza siporo mu buzima bwabo bwa buri munsi kugirango babe koko ba "mutimawurugo, abagore babereye u Rwanda." Yabahamagariye kwita ku isuku ku mubiri n'ahantu hose bakabera bandi urugero " ngo kuko umugore wita ku isuku aba ari ishema ry'umuryango abereye mutimawurugo.". Yongeyeho ko siporo n'isuku bibyara ubuzima buzira umuze.

Mu butumwa nyamukuru umuyobozi w'Akarere wungirije ushinzwe iterambere ry'ubukungu Bwana Uwihorereye Patrick yagize ati umubiri wacu ukeneye kwinyagambura bihoraho ntidutuma ugwa ikinya. Yatanze urugero ku batunze ibinyabiziga ko bahora bazirikana ubuzima bwabyo bakabijyana muri controle technique buri mwaka cyangwa buri mezi 6. Asaba ko "twakwita ku buzima bwacu twisuzumisha ku buryo bwa rusange umubiri wose nibura inshuro 1 mu mwaka." Ngo kuko ibinyabiziga bitarusha agaciro imibiri y'abantu kandi ari nabo babitunze.

Bwana Uwihoreye yakomoje no ku matora ya Perezida wa Repubulika n'ay'Abadepite ateganijwe muri Nyakanga 2024. Yayagereranije n'ubukwe buri wese agomba kwitegura neza byagera ku bagore bikaba akarusho. Yibukije ko sites z'amatora zigomba kuba ziboneye haba ku isuku ndetse n'imyiteguro. Yahamagariye abazitabira amatora kuzatora neza birinda ko hagira ijwi riba imfabusa.

Aha umukozi wa Komisiyo y'Igihugu y'Amatora yahawe umwanya asobanura uburyo udusanduku tuzashyirwamo impapuro z'itora tuzaba duteye avuga ko utuzashyirwamo amajwi ya Perezida wa Repubulika tuzaba dufite ibara ry'umweru naho utwagenewe amajwi y'abadepite tukazba dufite ibara ry'umukara. Yasabye kuzashishoza bihagije ngo hatagira uvaho yitiranya udusanduku kuko ngo bibaye bityo ijwi rye ryaba ribaye imfabusa.

Siporo yashojwe no kwipimisha indwara zitandura, umuvuduko w'amaraso, ibiro n'uburebure. Igikorwa cyitabiriwe n'abantu b'ingeri zose.

Siporo ni ubuzima, abagore twagiye. AMAFOTO