Ku ishuli ribanza rya BUTEZI mu  kagari ka Kazabe murenge wa Ngororero habereye umuhango wo gutaha igikorwa cyo kugeza ingufu z'amashanyarazi kuri  iki kigo cy'ishuri cyakozwe ku bufatanye n'intara ya Rhenanie Palatinat.
 Igikorwa cyatwaye agera kuri 45,000,000frws kigizwe no kugeza umuyoboro w'amashanyarazi kw'ishuli, gushyiraho transiformateri, gukwirakwiza urumuri mu byumba by'amashuli n'ahakikije ishuli. Abaturage bahegereye nabo bazafatiraho urumuri.

Madamu Christine Müller waje ayoboye delegation ya Rhenanie Palatinat yashimye ubuyobozi bw'Ikigo n'Akarere muri rusange urugwiro bakiranywe, ashima uburyo inkunga yatanzwe yageze ku kigo igakoreshwa neza icyo yari yagenewe.
Yijeje ubufatanye no gukomeza guha ikigo inkunga kikarushaho kwaguka.

Umujyanama wa Komite Nyobozi Bwana Mutwarangabo Innocent wari uhagarariye Ubuyobozi bw'Akarere yashimiye umufatanyabikorwa igikorwa gikomeye cyo kugeza ingufu z'amashanyarazi kuri iki kigo n'ibindi byakozwe mu yindi Mirenge  mu guteza imbere uburezi.  Yabijeje ubufatanye no kubyaza umusaruro inkunga yatanzwe.
Umuyobozi w'ishuli Karirwanda Jean Baptiste avuga ko izi ngufu z'amashanyarazi zizabafasha gukoresha ikoranabuhanga, kwigisha hifashishijwe za mudasobwa no kuzamura ireme ry'uburezi.
Umuhango witabiriwe kandi na Padiri mukuru wa Paroisse ya Rususa Gilbert Ntirandekura,  Umunyamabanga Nshingwabikorwa w'Umurenge  MUGISHA Daniel, MBONIMANA François umugenzuzi w'uburezi mu murenge
Hari kandi ubuyobozi bw'Akagari n'ababyeyi barera kuri iki kigo.
Umuhango waranzwe n'ibirori usozwa n'ubusabane.