Ihuriro ry'imiryango nyarwanda yita ku burenganzira bw'abantu bafite ubumuga NUDOR riri mu Karere ka Ngororero mu gihe cy'iminsi 3 mu rwego rwo kungurana ibitekerezo ku ubukangurambaga bwo kurengera abantu bafite ubumuga mu guhangana n'ibiza kimwe n'imihindagurikire y'ibihe  (climate changes).

Ku munsi wa mbere w'amahugurwa yayobowe na bwana Surwumwe Jean Claude/ Project manager haganiriwe ku nzitizi abafite ubumuga bahura nazo n'uburyo zabonerwa ibisubizo.
Izi nzitizi zijyanye n'imyitwarire, imyumvire, imibereho, imibanire, ibidukikije, ifatwa ry'ibyemezo.

Ku munsi wa 2 w'amahugurwa habayeho gukorera mu matsinda  hunguranywa ibitekerezo ku nzitizi abafite ubumuga bahura nazo mu buzima bwabo bwa buri munsi (uburezi, ubuvuzi,  itumanaho, transport,...) n'uburyo zabonerwa ibisubizo birambye.
Hanaganiriwe k'uburyo abafite ubumuga bakwitabwaho by'umwihariko mu gihe cy'ibiza kandi bigashyirwa mu igenamigambi ry'Akarere.
Aya mahugurwa yitabiriwe n'Umuyobozi w'Akarere wungirije ushinzwe iterambere ry'imibereho myiza y'abaturage Madame Mukunduhirwe Benjamine.

Ku munsi wa 3 w'amahugurwa hunguranywe ibitekerezo ku byakorwa kugirango imibereho y'abafite ubumuga irusheho kuba myiza:

-Gushyira mu igenamigambi ry'Akarere  imicungire y'ibiza kugirango abantu bafite ubumuga babone ubutabazi buboneye mu gihe byabaye.
-Kumenya aho abafite ubumuga baherereye no kubashyira mu byiciro hagendewe ku bumuga bafite
-Gushyiraho gahunda inoze yo gutabara abafite ubumuga igihe cy'ibiza
- Gushyiraho amakipe y'ubutabazi mu gihe cy'ibiza
-Kugaragaza ahibasirwa n'ibiza mu Karere hose (risk map)
Gushyiraho uruhererekane rwo guhanahana amakuru mu nzego zose
-Guteganya Strategic stock y'Akarere ihoraho irimo  ibyafasha abantu bafite ubumuga mu byiciro byabwo
-Guteganya uburyo bwo kwita ku bantu bashobora kumugarira muri ibyo biza
-Kwinjiza abantu bafite ubumuga muri gahunda z'Igihugu. (Disability mainstreaming inclusion)

-Hanaganiriwe ku ngingo ziri mu Itegeko Nshinga, amateka y'abaminisitiri arengera uburenganzira bw'abantu bafite ubumuga no ku nshingano z'Inama y'Igihugu y'abantu bafite ubumuga (NCPD).
Mu Karere ka Ngororero harabarurwa abafite ubumuga 8,270

NUDOR ifite ubutumwa bwo guharanira ko abantu bafite ubumuga bagira uburenganzira  n'amahirwe angana  nk'abandi banyarwanda.