Mu murenge wa Nyange ku rwibutso rwa Jenoside yakorewe Abatutsi rwa Nyange habereye igikorwa cyo kwibuka  inzirakarengane ziruhukiye muri uru rwibutso.
Abitabiriye kwibuka bahawe ikaze n'umuyobozi w'Akarere Bwana Nkusi Christophe wagarutse ku inzira y'umusaraba n'amateka ashaririye Abatutsi banyuzemo, ashimira ubutwari bwabaranze n'uburyo abarokotse Jenoside banze guheranwa n'agahinda bakaba batanga umuganda ukomeye mu kubaka urwababyaye.

Yanenze abakibiba amacakuburi mu banyarwanda asaba buri wese kubamaganira kure hanirindwa amagambo n'ibikorwa byatoneka inkovu z'abarokotse bihembera ingengabitekerezo ya jenoside.
Umwe mu barokotse Jenoside yakorewe Abatutsi Rwamasirabo Aloys yagarutse ku bwicanyi ndengakamere buvanze n'agashinyaguro bwabereye i Nyange. Abatutsi bari bahungiye mu Kiliziya y'aho baje kuyitikiriramo bayirituriweho na kateripirari ku mabwiriza y'uwari padiri mukuru Seromba.
Perezida wa Ibuka ku rwego rw'Igihugu  yagarutse ku ruhare rw'amadini muri Jenoside yakorewe Abatutsi. Ati baje guteshuka ku nshingano zabo bagambanira abo bashinzwe bataretse bagenzi babo.
Yasabye abapadiri n'abandi bakozi b'Imana kugira uruhare rukomeye mw'isanamitima.

Minisitiri ushinzwe ibikorwa by'ubutabazi Hon. Kayisire marie Solange yagaye abanyamadini bari bashinzwe umukumbi w'Imana aho kuwukenura bakawugambanira.Yibukije ko  ahari imibiri y'abishwe muri Jenoside hakwerekanwa kugirango ishyingurwe mu cyubahiro`
Yagarutse ku butwari bw'abana b'i Nyange bari mu ntwari z'Imena asaba buri wese kubafataho icyitegererezo.

Yahamagariye buri wese by'umwihariko urubyiruko kwamaganira kure ingengabitekerezo ya jenoside.
Yasabye ubuyobozi gukomeza kubungabunga ibimenyetso bya Jenoside yakorewe Abatutsi birimo inzibutso.
Yasabye kuba hafi abarokotse ntihagire igihungabanya ubuzima bwabo.
Igikorwa cyashojwe no gushyingura mu cyubahiro imibiri 19 y'abishwe muri Jenoside yakorewe Abatutsi iherutse kuboneka.

Iki gikorwa cyo kwibuka cyabanjirijwe n'ijoro ryo kwibuka ku nshuro ya 28 jenoside yakorerwe Abatutsi ryitabiriwe n'umyobozi w'Akarere ari kumwe n'abapadiri ba paroisse ya Nyange n'abaturage.