Mu murenge wa Gatumba ku cyicaro cya Ngororero Mining Company (NMC) habereye inama ku kurwanya ubucukuzi bw'amabuye y'agaciro bunyuranije n'amategeko. Inama yahuje Umuyobozi wa Police ku rwego rw'Intara RPC CP  Emmanuel Hatari , umuyobozi w'Akarere Bwana NKUSI Christophe, abayobozi b'inzego z'umutekano zikorera mu Karere, abayobozi ba companies zicukura amabuye y'agaciro, abakozi bazo n'abaturage.

CP Hatari yibukije abari mu nama ko ari icyaha gihanwa n'amategeko kwishora mu bucukuzi utabifitiye uburenganzira. Ati ntabwo bizihanganirwa ko ubucukuzi butemewe n'amategeko bwashyira ubuzima bw'abantu mu kaga ari nako bwangiza ibidukikije. 

Ati "amabuye y'agaciro ntiyagakwiye kuba ikibazo aho kuba igisubizo."
Abaturage bahawe umwanya wo kubaza no gutanga ibitekerezo ku bucukuzi bukorwa binyuranije n'amategeko. Babwamaganye bavuga ko buhitana ubuzima bw'abantu, bukangiza ibidukikije n'imirima yabo kandi bugatuma habaho gucuruza amabuye ku buryo bwa magendu.

 Mayor Nkusi yasabye ba nyiri ama companies guha akazi abaturage begereye ibirombe byabo by'umwihariko urubyiruko.
Mu nama yihariye ama companies yanenzwe ko amwe muri yo atiza umurindi ubucukuzi bunyuranije n'amategeko igihe agura amabuye ku buryo bwa magendu.
Ikindi yanenzwe ni ugucukura mu kajagari aho usanga bagura amabuye yacukuwe mu mirima y'abaturage itari mu mbago zayo.
 Hanezwe kandi abayobozi ba companies batitabiriye inama ifatirwamo ibyemezo bakohereza abahagarariye badashobora gufata ibyemezo.

CP Hatari yavuze ko RMB, Ubuyobozi bw'Akarere na Police barakomeza guhuza imbaraga kugirango ubu bucukuzi butemewe bucike burundu.
Companies zizongera gufatwa muri magendu zizafatirwa ibyemezo bikomeye birimo no guhagarikwa.
Yagarutse ku  kubahiriza ibidukikije avuga ko ari politiki y'Igihugu yo kubirengera ko ubyangiza wese agomba kubihanirwa uko amategeko abiteganya.
Umuyobozi wa NMC yasabye bagenzi be ko bashyiraho koperative y'abacukuzi bityo ubuliganya buba muri uyu mwuga bukavaho,  bakanasangira amakuru ku biciro by'amabuye y'agaciro.
Ba nyiri companies biyemereye ko ibibazo biboneka mu bucukuzi bitakwitirirwa abaturage ko ahubwo umuti wabyo uri mu bacukuzi banini.
Biyemeje gukora neza mu nyungu zabo batirengagije iz'abaturage bakoresha bakababera igisubizo aho kubaremerera.
Umuyobozi wa NMC yahamije ko abacukuzi bashyize hamwe bakemura ibibazo biremereye Akarere birimo  ibibangamiye imibereho myiza y'abaturage.
Hashyizweho urubuga rwo guhanahana amakuru ku gihe ruzanafasha kurwanya magendu n'ibindi biharabika umwuga w'ubucukuzi.