Uyu munsi ku rwego rw'Intara y'Iburengerazuba Umunsi mpuzamahanga w'umugore  wizihirijwe mu Karere ka Ngororero. Guverineri w'Intara Habitegeko Francis yifatanyije n'abaturage b'umurenge wa Kavumu muri ibi birori.
Ibirori byatangijwe no kugaburira abana indyo yuzuye mw'irerero UMUCYO rya Murimba B. Igikorwa cyayobowe na Guverineri Habitegeko ari kumwe n'umuyobozi w'Akarere Bwana Nkusi Christophe, umuyobozi w'Akarere wungirije ushinzwe iterambere ry'imibereho myiza y'abaturage Madame Mukunduhirwe Benjamine, abayobozi b'Inama y'Igihugu y'Abagore ku rwego rw'Inatara n'Akarere, abayobozi b'inzego z'umutekano n'abafatanyabikorwa batandukanye. 

Bakomeje berekwa umusaruro wavuye mu buhinzi, banatanga impamyabumenyi ku banyeshuri b'abakobwa batwise inda zitateganijwe barangije mu myuga itandukanye.
Mu kwakira abashyitsi umuyobozi w'Akarere yagize ati: "uyu munsi mukuru mpuzamahanga w'umugore utubere umwanya ukomeye dufatanije na ba Mutimawurugo mu kurandura igwingira ridutera icyasha mu Karere kacu....Turwanye ikiritiza umurindi nk'amakimbirane mu miryango, imyumvire ikiri hasi, kudategura indyo yuzuye, kubyara abo "tudashoboye kurera,..."

Umuyobozi w'Inama y'igihugu y'abagore ku rwego rw'Intara yagize ati tubabazawa na bagenzi bacu bumvise uburinganire nabi bakaba batinda mu kabari bitabakwiriye. Yongeyeho ko abagore batagikeneye gusunikwa ko ahubwo baharanira kwigira bakora cyane.

Guverineri w'Intara yashimiye abafatanyabikorwa bahuriza hamwe imbaraga mu kurwanya imirire mibi n'igwingira, yashimiye ba Mutimawurugo bakataje mw'iterambere  baharanira imibereho myiza y'imiryango yabo asaba imbaga y'abaturage bari bitabiriye ibirori kubafataho urugero.
Ibirori byaranzwe no gutangiza gahunda nshya yo kurwanya imirire mibi n'igwingira yiswe "umuganura w'umwana" yateguwe n'Akarere ka Ngororero.
Iyi gahunda yagaragayemo abafatanyabikorwa batandukanye:
- Abakozi b"akarere bakusanyije inkunga igera kuri miliyoni 7 zo kunganira amarerero ari mu Karere.
-  Abagize Inama Njyanama y'Akarere nabo bari gutanga inkunga y'ibiribwa n'amata mu marerero mu cyumweru cyahariwe umujyanama."
- Abandi bafatanyabikorwa  barimo Prisme/Heifer International, Areco Rwanda Nziza, Garden for Health International, Spout of Water batanze inkunga zitandukanye.

Intara yatanze smart phones ku baturage babaye indashyikirwa mu kurwanya imirire mibi, umurenge wa Kavumu watanze inka 23.

Ikibazo cy'imirire mibi n'igwingira cyarahagurukiwe. Abafatanyabikorwa mu kugishakira umuti baragenda biyongera nta gushidikanya ko kizakemuka burundu.