Kuri uyu wa 27/05/2023 mu Mirenge yose igize Akarere ka Ngororero hakozwe Umuganda Rusange usoza Ukwezi kwa Gicurasi 2023 hibandwa ku bikorwa byo gutunganya imihanda yangijwe n'ibiza no kurwanya isuri.

Ku rwego rw'Akarere uyu muganda wakorewe mu Murenge wa Kageyo mu Kagali ka Mukore mu Mudugudu wa Kabuhake ahakozwe igikorwa cyo gutunganya umuhanda wangijwe n'ibiza hasiburwa imiyoboro ijyana amazi. Itsinda ry'Abadepite mu Nteko Ishinga Amategeko y'u Rwanda  Honorable MUKAMANA Elisabeth na Honorable MUREBWAYIRE Christine bari kumwe n'Umuyobozi w'Akarere Bwana NKUSI Christophe n'Umuyobozi wa Police mu Karere CIP Julien NKURIKIYINKA bifatanyayije n'abaturage b'umurenge wa Kageyo muri uyu muganda.

Umuyobozi w'Akarere Wungirije Ushinzwe Iterambere ry'Imibereho Myiza y'Abaturage Madamu MUKUNDUHIRWE Benjamine we yifatanyije n'Abaturage n'Umurenge wa Hindiro ahacukuwe imirwanyasuri.

Nyuma y'umuganda abaturage bahawe ubutumwa bukurikira:

- Ubutumwa bwo kwihanganisha imiryango yagizweho ingaruka n'ibiza

- Ubutumwa bwa MINALOC bwo gukangurira abanyarwanda kugira Umuco w'Isuku n'Isukura

- Ubutumwa bwa Polisi y'Igihugu bujyanye no kubahiriza Amategeko y'Umuhanda muri gahunda y'Ubukangurambaga bwa "Gerayo amahoro"

- Ubutumwa bushishikariza abaturage kugira uruhare mu Iterambere ry'Akarere mu bijyanye n'ishoramari, ubukerarugendo n'inganda

- Ubutumwa bushishikariza abaturage kwitabira gahunda za Leta

Muri uyu muganda kandi hirya no hino mu mirenge itandukanye igize Akarere ka Ngororero hatangijwe ku mugaragaro ubukangurambaga ku Isuku n'isukura buzageza kuwa 26/04/2024.

Insanganyamatsiko y'ubu bukangurambaga igira iti : "ISUKU HOSE IHERA KURI NJYE".

Ku rwego rw'Akarere ubu bukangurambaga bwatangirijwe mu murenge wa Kageyo butangizwa n'Umuyobozi w'Akarere Bwana NKUSI Christophe ari kumwe n'Abadepite mu Nteko Ishinga Amategeko Honorable MUKAMANA Elisabeth na Honorable MUREBWAYIRE Christine n'Umuyobozi wa Police mu Karere CIP Julien NKURIKIYINKA. Ikiganiro kurri ubu bukangurambaga cyatanzwe n'umuyobozi w'ishami ry'ubuzima Nyirimpuhwe Jean d'Amour.

Ubu bukangurambaga bwatangijwe mu mirenge yose igize Akarere ka Ngororero hakorwa ibikorwa bikurikira:

- Inyigisho zahawe abaturage bitabiriye umuganda rusange mu mirenge yose zibakangurira kurangwa n'umuco w'Isuku n'Isukura

 - Umuganda kuri Sites zose zicumbikiweho imiryango yagizweho ingaruka n'ibiza

- Ubukangurambaga mu Bigo by'amashuri ari mu Karere hakorwa ibikorwa byo gusukura ahantu hatandukanye mu bigo.

Abaturage bahawe umwanya wo gutanga ibitekerezo. Ibibazo byabajijwe byahawe umurongo.

Nyuma y'umuganda intumwa za rubanda batangaje uruzinduko rw'iiminsi 5 (27/06-3/05/2023) bagiye kugirira mu mirenge ya Kageyo, Kabaya, Nyange, Muhanda na Ngororero baganira na rubanda rwabatume.Hari mu nama y'abahuje n'Umuyobozi w'Akarere Bwana NKUSI Christophe ari kumwe n'Umuyobozi w'Akarere Wungirije Ushinzwe Iterambere ry'Ubukungu Bwana UWIHOREYE Patrick, Umuyobozi w'Akarere Wungirije Ushinzwe Iterambere ry'Imibereho Myiza y'Abaturage Madamu MUKUNDUHIRWE Benjamine, Umunyamabanga Nshingwabikorwa w'Akarere Bwana BAHIZI Emmanuel, Abanyamabanga Nshingwabikorwa b'Imirenge, Abahagarariye Ibigo bicumbikira abantu, Abayobozi b'inganda nto n'izicitiritse, Abahagarariye Urubyiruko n'Abagore, Abakozi b'Akarere mu mashami y'Ubucuruzi n'Ishoramari, Ubuhinzi n'ubworozi, Imiyoborere myiza n'ishami ry'ubutaka n'ibikorwaremezo.

Bagaragarijwe aho ibibazo abaturage babajije Abadepite bigeze bikemuka, ingamba zo kwihutisha ibitarakemuka n'ibibazo bikeneye ubuvugizi; ngamba zo guteza imbere Ubukerarugendo, amacumbi, ishoramari, inganda nto n'iziciriritse.

Abadepite bashimye ibyo bagaragarijwe basaba ko ibibazo by'abaturage bitarakemuka byitabwaho bigakemuka. Basabye kubyaza umusaruro amahirwe ari mu Karere, atarabyazwa umusaruro agakoreshwa hagamijwe kwihutisha Iterambere ry'abaturage.