Uyu munsi hasojwe uruzinduko rw'iminsi ibiri Itsinda ry'Abasenateri n'Abadepite mu Nteko Ishinga Amategeko y'U Rwanda baturutse muri FFRP (Forum des Femmes Rwandaises Parlementaires) hagamijwe gusuzuma ikibazo cy'imirire mibi n'igwingira igaragara mu Karere ka Ngororero.

Itsinda ryasuye Akarere ka Ngororero ryari riyobowe na Honorable Depite Uwera Kayumba Marie Alice rigizwe n'Abasenateri 2 (Nkusi Juvenal na Habineza Faustin) n'Abadepite 5 (Uwera Kayumba Marie Alice, Manirarora Annoncee, Nyabyenda Damien, Kalinijabo Barthelemy, Uwanyirigira Mari Florence).

Ku munsi wa mbere w'uruzinduko hakozwe Inama yo kugaragaza ishusho rusange y'ikibazo cy'imirire mibi n'igwingira mu Karere n'ingamba zihari. Bamenyeshejwe ko Akarere kavuye kuri 50,5 %  by'abana bagwingiye mu mwaka wa 2020 kakagera kuri 23,6% mu mwaka wa 2023. Banasuye bimwe mu bigo nderabuzima harebwa uko gahunda zo kurwanya imirire mibi n'igwingira zishyirwa mu bikorwa.

Mu cyegeranyo cyakozwe n'Ishami ry'ubuzima Umuyobozi w'Akarere wungirije ushinzwe iterambere ry'imibereho myiza y'abaturage Madamu Mukunduhirwe Benjamine yagaragaje ingamba zafashwe mu kugabanya umubare w'abana bangwingiye anerekana n'imbogamizi ziri muri uru rugamba rwo kurwanya imirire mibi n'igwingira.

Zimwe mu ngamba: ku rwego rw'akarere, umurenge n'akagari hashyizweho gahunda zo kurwanya igwingira na komite zikurikirana ishyirwamubikorea buri gihembwe, ubukangurambaga buhoraho mu nteko z'abaturage, mu muganda no mu zindi nama zihuza abantu benshi; ibiganiro ku ma radiyo, icyumweru cyahariwe ubuzima bw'umwana n'umubyeyi, igikoni cy'umudugudu, inkono y'umwana, umuganura w'umwana, ubutumwa hifashishijwe indangururamajwi muri centres z'ubucuruzi, gusura imiryango, ubuftanye n'abafatanyabikorwa batandukanye, guha imiryango itishoboye inkoko (PRISM, WORLD BANK, FAO, Garden fo Health International, Inama y'Igihugu y'Abagore /NWC ); gutanga inyunganiramirire, gukwirakwiza amazi meza, gahunda y'isuku n'isukura n'ibindi...

Zimwe mu mbogamizi: Ibigo mbonezamikurire bidhagije kimwe n'ibikoresho bidahagije,amikoro make muri imwe mu miryango, amazi meza ataragera kuri bose, imyumvire ikiri hasi muri imwe mu miryango ku bijyanye no gutegura indyo yuzuye, ibiza byangije imwe mu miyoboro y'amazi,...

Ibisubizo byihuse na gahunda zizakomeza kunozwa: gukomeza ubukangurambaga ku isuku n'isukura, gukomeza gukwirakwiza amazi meza (ubu hari umushinga mugari muri iki gikorwa), gukomeza guhanga udushya mu kurwanya igwingira no guha imbaraga utwahanzwe (igitondo cy'isuku, tumurere neza, umuganura w'umwana, parrainage, igi ku mwana ku munsi, kuzamura umubare w'ibiti by'imbuto mu miryango, gukomeza uturima tw'igikoni, ubworozi bw'inkoko, guhinga ibihumyo, ibishyimbo bikungahaye ku butare n'ibijumba bikungahe kuri Vit A), gukomeza gahunda ya GIRA WIGIRE, kubyara abashoboye kurerwa, kurwanya amakimbirane mu miryango, gukomeza ubufatanye n'abafatanyabikorwa (RBC/SPRP,NCDA, Caritas Rwanda, Orora Wihaze,FAO,WHO, PAM, UNICEF, PRISM, WORLD VISION, n'abandi )

Hasuwe ibigo nderabuzima byo mu mirenge 7 kuri 13 igize Akarere ariyo Matyazo,Hindiro, Hindiro, Muhororo, Kabaya, Kageyo na Gatumba

Kuri  munsi wa kabiri w'uruzinduko Intumwa za rubanda zifatanyije n'abaturage mu muganda rusange usoza Ukwezi kwa Nzeri 2023 baganira nabo ku kibazo cy'imirire mibi n'igwingira n'ingamba zo kugikemura. Uyu muganda wanitabiriwe n'Umunyabanga nshingwabikorwa w'Intara y'Uburengarazuba Madamu Uwambajemariya Florence. Hanasuwe imwe mu miryango yahawe inyunganiramirire na NSDS (Nutrition Sensitive Direct Support) harebwa icyo izi nkunga zabamariye. Muri rusange basanze imiryango yahawe izi nkunga yariteje intambwe mu mibereho y'urugo nubwo hari iyayifashe nabi. Aha Intumwa za Rubanda zasabye ubuyobozi bw'Akarere gukurikirana byimbitse imikoreshereze y'izi nkunga kugirango abazihawe bagire icyo bigezaho.

Nyuma yo kuva mu muganda hakozwe inama  yo kugaragaza ibyavuye mu ngendo zakozwe n'intumwa za rubanda mu mirenge yavuzwe hejuru.

Ubuyobozi bw'Akarere bwijeje gukemura mu buryo bwihuse ibibazo byagaragajwe bibangamiye gahunda yo kurwanya imirire mibi n'igwingira.

Intumwa za rubanda zijeje ubuvugizi ku bibazo birenze ubushobozi bw'Akarere birimo gusana imihanda yangijwe n'ibiza.

Iri tsinda ry'Intumwa za rubanda ryakiriwe n'Umuyobozi w'Akarere Bwana NKUSI Christophe, Umuyobozi w'Akarere Wungirije Ushinzwe Iterambere ry'Ubukungu Bwana UWIHOREYE Patrick, Umuyobozi w'Akarere Wungirije Ushinzwe Iterambere ry'Imibereho Myiza y'Abaturage Madamu MUKUNDUHIRWE Benjamine, Umuyobozi w'Imirimo Rusange mu Karere Bwana NDAYIKENGURUKIYE Jean Luc, Perezida wa PSF mu Karere Bwana SANO Emmanuel, Umuhuzabikorwa w'Inama y'Igihugu y'Urubyiruko Bwana BYIRINGIRO Amani, Umuyobozi w'Inkeragutabara mu Karere Lt. Col Edouard NKURANYABAHIZI, Umuyobozi w'Ingabo Maj Joseph RUHOGO, NISS DISO NSENGIMANA Jean Claude, Uhagarariye Umuyobozi wa Police S/Sgt NIYITEGEKA JMV, Umuhuzabikorwa wa DASSO mu Karere SAKINDI Damascene, Abakozi b'Akarere n'Abafatanyabikorwa b'Akarere mu kurwanya imirire mibi n'igwingira.