Uyu munsi ntore z'inkomezabigwi icyiciro cya 10 zashoje urugerero bamazeho amezi 3. Ku rwego rw'Akarere ibirori byabereye  mu murenge wa Hindiro wahize iyindi mu bikorwa by'Intore ku rugerero.

Bavuga amacumu bagaragaje ibyo bagezeho:
Barwanije isuri bacukura imiringoti, bateye ibiti ahakunze kwibasirwa n'amasuri, bubatse imirima y'ibikoni, bigishije abaturage ikoranabuhanga hakoreshejwe telefoni, bubakiye abatishoboye amazu n'ubwiherero.
 Batojwe byinshi birimo gukunda Igihugu no kugikorera,  gukomera ku bumwe bw'abanyarwanda, gukunda no kwihangira imirimo, hifashishijwe ikoranabuhanga  kurwanya ababiba amacakubiri n'abagipfobya Jenoside yakorewe Abatutsi, guhanga udushya n'intambwe idasobanya.

Mu mpanuro bahawe n'umuyobozi w'Ingabo mu turere twa Ngororero na Rutsiro basabwe kurangwa n'ubutwari mubyo bakora byose ndetse bakanitabira kwinjira mu ngabo z'Igihugu.
Umuyobozi w'Akarere bwana Nkusi Christophe yavuze ku mateka yaranze ubutore mu Rwanda n'indangagaciro na kirazira zajyanaga nabwo. Yashimiye urubyiruko ko rukataje muri uyu mujyo yongera kubasaba gukunda no kwitabira umirimo no kwirinda ingeso mibi zirimo ubusambanyi no gufata ibiyobyabwenge. Yashimiye n'ababyeyi bashishikarije abana babo umuco wo kwiyubakira Igihugu.
Mayor Nkusi yanashimiye ubuyobozi bwiza bw'Igihugu cyacu buha agaciro urubyiruko rwo mbaraga z'Igihugu zubaka kandi vuba.
Urubyiruko rwavuze ku mbogamizi rugifite nko kubura ibibuga bihagije by'imyidagaduro n'ibikoresho bya siporo. Umuyobozi w'Akarere yabijeje ko bizakemuka vuba.