Ni abana 170 bari basembereye mu twumba batijwe n'itorero ADEPR Kazabe. Kuri uyu wa 20/06/2023 hatashywe ibyumba by'amashuli 4 byubatswe muri uyu mwaka wa 2022/2023 ku bufatanye bw'Akarere n'ababyeyi batanze umuganda basiza ibibanza, batwara amabuye, umucanga n'ibindi bikoresho.  Nk'uko byavuzwe n'umunyamabanga nshingwabikorwa w'umurenge wa Ngororero Bwana Mugisha Daniel ibi byumba bifite agaciro gakabakaba agera kuri miliyoni 38. Agaciro k'umuganda w'abaturage karabarirwa muri miliyoni 4. Abana n'ababyeyi basazwe n'ibiyishimo.

Ni igikorwa cyitabiriwe numuyobozi w'Akarere Bwana NKUSI Christophe wari kumwe na SHYEREZO Norbert, President wa Komisiyo y'Imiyoborere myiza mu Nama Njyanama y'Akarere, bamwe mu bajyanama n'abayobozi b'inzego z'umutekano zikorera mu Karere.

Mu butumwa Umuyobozi w'Akarere yagejeje ku bitabiriye igikorwa, yashimye Ubuyozi bwiza  bw'Igihugu cyacu  ku nkunga batanze ngo amashuri yubakwe, ndetse ashimira uruhare rwa buri wese ku musanzu we mu kubaka aya mashuri. Yasabye ubuyozi bw'Ikigo gufata neza iyi nyubako no gukoresha amahirwe bahawe mu kongera imitsindire y'abanyeshuri.
Yasoje asaba ababyeyi gukomeza kuba hafi abana babarinda icyatuma basiba ishuri.

Igikorwa cyasojwe no gutanga seritifika ku baturage 42 bize gusoma no kwandika muri aka Kagari muri uyu mwaka w'imihigo.

Gutaha aya mashuli byabaye nyuma y'inteko z'abaturage mu tugari twose. Komisiyo y'imiyoborere myiza mu Nama Njyanama y'Akarere  iyobowe na Bwana SHYEREZO Norbert yitabiriye inteko y'abaturage mu kagari ka Mugano mu murenge wa Ngororero. Bari kumwe n'Umuyobozi w'Akarere Bwana NKUSI Christophe nawe uyibarizwamo babanjye gusura abaturage bahuye n'ibiza aho bakodesherejwe mu mudugudu wa Mpara. Basanze babayeho neza bababwira ko Leta ikomeje kuba hafi yabo.

Ibyaganiriweho mu nteko:  imiyoborere myiza ibereye umuturage,  isuku ku mubiri no mu rugo, kwirinda amakimbirane mu ngo no mu muryango,
ibibazo by'abaturage batanyuzwe n'uko akagari n'umurenge babikemuye.

Naho tsinda riyobowe n'umuyobozi w'Akarere wungirije ushinzwe iterambere ry'ubukungu Bwana UWIHOREYE Patrick ryasuye umurenge wa Bwira
bareba aho imirimo yo gusanira amazu abahuye n'ibiza igeze, niba hari imbogamizi zihari zatuma imirimo itihuta.  
Basanze nta nzitizi zihari imirimo iri kugenda neza hemezwa ko mu minsi irindwi izi nzu uko ari 5 zizaba zarangiye zose.

Bifatanyije n'abaturage b'akagari  ka Gashubi mu nteko yabo  banareba ahagiye kubakwa isoko rijyanye n'igihe. Baganiriye n'abacuruzi n'abaturage  uko biteguye kwakira iryo soko.
Abaturage bagaragaje ko baryishimiye,  ko bazigira uruhare mu kuryubaka no kuribungabunga.  
Bashimiye byimazeyo Nyakubahwa Perezida wa Repubulika  udahwema gutekereza icyateza imbere abaturage bityo akaba abazaniye Isoko.
Vm Uwihoreye yari kumwe na Lt Colonel Donath BIKAGA,
umuyobozi w'inkeragutabara mu Karere na SSP Faustin BAHIZI.
Bakiriwe n'umunyamabanga nshingwabikorwa w'umurenge
Bwana MUSABYIMANA Japhet.

Umuyobozi w'Akarere wungirije ushinzwe imibereho myiza y'abaturage Madame Mukunduhirwe Benjamine we yakoreye mu murenge wa Kabaya mu nteko z'abaturage. Nawe yasuye amazu ari kubakirwa abasenyewe n'ibiza.

Hatanzwe inama zitandukanye zizafasha mu kwihutisha kuvugurura inzu zangijwe n'ibiza harimo kongera umubare w'abakozi bari kubaka no kubahembera ku gihe imirimo bakora.