Uyu munsi Guverineri w'Intara y'Iburengerazuba Hon. Jean Bosco Ntibitura yagiriye uruzinduko rw'akazi mu Karere ka Ngororero aho yguranye ibiganiro n'abaturage b'imirenge ya Gatumba na Muhororo. 

 Mu  kiganiro kirambuye yagiranye nabo yabasabye  gukomeza gusigasira umutekano birinda

gucukura amabuye y'agaciro ku buryo bunyuranije n'amategeko kuko bikurura umutekano muke harimo  imfu no kwangiza ibidukikije. 

Agaruka ku ngengabitekerezo ya Jenoside iherutse kugaragara mu Karere yibukije abaturage guca ukubiri nayo ahubwo bagakomera ku "bumwe bwacu kuko nizo mbaraga zacu."

Avuga ku bujura bw'insinga z'amashanyarazi bwagaragaye mu Karere, yasabye abaturage  gutangira amakuru ku gihe  abo bagizi ba nabi bagahanwa bihanukiriye kuko "bamunga itrambere ry'igihugu twese twifuza."

Abaturage banakurikiye ikiganiro ku bumwe n'ubudaheranwa bw'Abanyarwanda.

Bahawe umwanya wo gusasa inzobe n'abayobozi babaza ibibazo banagaragaza uburyo bishimiye ubuyobozi bwiza rw'Igihugu cyacu.

Nyuma Guverineri yaje kugirana inama yihariye n'abayobozi n'abavuga rikumvikana abibutsa inshingano zabo mu gushyira umuturage ku isonga.

Guverineri Ntibitura yaje aherekejwe n'abayobozi b'inzego z'umutekano ku rwego rw'Intara, yakiriwe n'Umuyobozi w'Akarere @cnkusi20 ari kumwe n'abandi bagize Komite Nyobozi y'Akarere, abayobozi b'Inzego z'Umutekano zikorera mu Karere, abayobozi b'Imirenge n'ab'amashami, abaturage b'Imirenge ya Gatumba na Muhororo.